jis ko dekho use dawa hai shanasai ka

jis ko dekho use dā'va hai shanāsā.ī kā

bhed samjhā na koī us but-e-harjā.ī kā

sab meñ maujūd hai aur phir bhī hai sab se judā

kyā 'ajab Dhañg hai us yaar kī yaktā.ī kā

ek pal bhī vo judā mere tasavvur se nahīñ

kitnā ehsās hai un ko merī tanhā.ī kā

baat terī hai agar log uḌāte haiñ mazāq

varna kuchh is meñ bigaḌtā nahīñ saudā.ī kā

āsmāñ par ye nahīñ jalva-figan qaus-o-quzah

ek halqa sā hai ḳhāka hai terī añgḌā.ī kā

husn be-tāb hai ḳhud jalva-numā.ī ke liye

muft meñ naam hai badnām tamannā.ī kā

un kī nazroñ ne hī maarā hai mujhe ai 'sājid'

jin kī nazroñ meñ hai e.ajāz masīhā.ī kā

jis ko dekho use da'wa hai shanasai ka

bhed samjha na koi us but-e-harjai ka

sab mein maujud hai aur phir bhi hai sab se juda

kya 'ajab Dhang hai us yar ki yaktai ka

ek pal bhi wo juda mere tasawwur se nahin

kitna ehsas hai un ko meri tanhai ka

baat teri hai agar log uDate hain mazaq

warna kuchh is mein bigaDta nahin saudai ka

aasman par ye nahin jalwa-figan qaus-o-quzah

ek halqa sa hai KHaka hai teri angDai ka

husn be-tab hai KHud jalwa-numai ke liye

muft mein nam hai badnam tamannai ka

un ki nazron ne hi mara hai mujhe ai 'sajid'

jin ki nazron mein hai eajaz masihai ka