kaho bulbul se le jawe chaman se aashiyan apna

kaho bulbul se le jaave chaman se āshiyāñ apnā

paḌhe gar sad hazār afsūñ na hogā bāġhbāñ apnā

huī jab baaġh se ruḳhsat kahā ro-ro ke yā qismat

likhā thā yuuñ ki fasl-e-gul meñ chhoTe āshiyāñ apnā

alam kar is tarh ruuvī ki rusvā ho ga.ī bulbul

Dubāyā haaye āñkhoñ ne tamāmī ḳhānumāñ apnā

uThā kar le chalī bulbul chaman se āshiyāñ apnā

kahā gul se ki le ye be-vafā ham se makāñ apnā

ye hasrat rah ga.ī kis kis maze se zindagī karte

agar hotā chaman apnā gul apnā bāġhbāñ apnā

mirā jaltā hai jī us bulbul-e-be-kas kī ġhurbat par

ki gul ke āsare par yuuñ luTāyā ḳhānumāñ apnā

magar dil se niba rakhnā 'alī gauhar se pyāre ko

vo shāhī go ki rakhtā hai vale hai mehrbāñ apnā

kaho bulbul se le jawe chaman se aashiyan apna

paDhe gar sad hazar afsun na hoga baghban apna

hui jab bagh se ruKHsat kaha ro-ro ke ya qismat

likha tha yun ki fasl-e-gul mein chhoTe aashiyan apna

alam kar is tarh ruwi ki ruswa ho gai bulbul

Dubaya haye aankhon ne tamami KHanuman apna

uTha kar le chali bulbul chaman se aashiyan apna

kaha gul se ki le ye be-wafa hum se makan apna

ye hasrat rah gai kis kis maze se zindagi karte

agar hota chaman apna gul apna baghban apna

mera jalta hai ji us bulbul-e-be-kas ki ghurbat par

ki gul ke aasare par yun luTaya KHanuman apna

magar dil se niba rakhna 'ali gauhar se pyare ko

wo shahi go ki rakhta hai wale hai mehrban apna