کہو بلبل سے لے جاوے چمن سے آشیاں اپنا

کہو بلبل سے لے جاوے چمن سے آشیاں اپنا

پڑھے گر صد ہزار افسوں نہ ہوگا باغباں اپنا

ہوئی جب باغ سے رخصت کہا رو رو کے یا قسمت

لکھا تھا یوں کہ فصل گل میں چھوٹے آشیاں اپنا

الم کر اس طرح روی کہ رسوا ہو گئی بلبل

ڈبایا ہائے آنکھوں نے تمامی خانماں اپنا

اٹھا کر لے چلی بلبل چمن سے آشیاں اپنا

کہا گل سے کہ لے یہ بے وفا ہم سے مکاں اپنا

یہ حسرت رہ گئی کس کس مزے سے زندگی کرتے

اگر ہوتا چمن اپنا گل اپنا باغباں اپنا

مرا جلتا ہے جی اس بلبل بے کس کی غربت پر

کہ گل کے آسرے پر یوں لٹایا خانماں اپنا

مگر دل سے نبہ رکھنا علی گوہر سے پیارے کو

وہ شاہی گو کہ رکھتا ہے ولے ہے مہرباں اپنا