mahw-e-jamal-e-yar ko fursat-e-bandagi nahin

mahv-e-jamāl-e-yār ko fursat-e-bandagī nahīñ

us ke huzūr bandagī kufr hai bandagī nahīñ

'ishq kī rasm-o-rāh kā us ko shu.ūr hī nahīñ

kufr kī bārgāh meñ jis kī jabīñ jhukī nahīñ

mast-nigāh se tirī ’arq-e-mai tahūr hoñ

tere jamāl kī qasam ab koī tishnagī nahīñ

vo bhī mere firāq meñ merī tarah hai muztarib

bichhḌe zamāna ho gayā dard meñ kuchh kamī nahīñ

mahv-e-salāt-e-dā.imī kaun-o-makāñ se be-ḳhabar

sajda nahīñ rukū' nahīñ koī qayām hī nahīñ

tere harīm-e-nāz kā us ko milā na rāsta

jis kī siyāh raat meñ ashkoñ kī raushnī nahīñ

yād-e-habīb ke baġhair jitnā bhī vaqt ham jiye

utnā hī vaqt be-gumāñ shāmil-e-zindagī nahīñ

sham'-e-shab-e-firāq se hāl-e-'alīm' pūchh ke

tū ne lagā.ī thī jo aag terī qasam bujhī nahīñ

mahw-e-jamal-e-yar ko fursat-e-bandagi nahin

us ke huzur bandagi kufr hai bandagi nahin

'ishq ki rasm-o-rah ka us ko shuur hi nahin

kufr ki bargah mein jis ki jabin jhuki nahin

mast-nigah se teri ’arq-e-mai tahur hon

tere jamal ki qasam ab koi tishnagi nahin

wo bhi mere firaq mein meri tarah hai muztarib

bichhDe zamana ho gaya dard mein kuchh kami nahin

mahw-e-salat-e-daimi kaun-o-makan se be-KHabar

sajda nahin ruku' nahin koi qayam hi nahin

tere harim-e-naz ka us ko mila na rasta

jis ki siyah raat mein ashkon ki raushni nahin

yaad-e-habib ke baghair jitna bhi waqt hum jiye

utna hi waqt be-guman shamil-e-zindagi nahin

sham'-e-shab-e-firaq se haal-e-'alim' puchh ke

tu ne lagai thi jo aag teri qasam bujhi nahin