محو جمال یار کو فرصت بندگی نہیں

محو جمال یار کو فرصت بندگی نہیں

اس کے حضور بندگی کفر ہے بندگی نہیں

عشق کی رسم و راہ کا اس کو شعور ہی نہیں

کفر کی بارگاہ میں جس کی جبیں جھکی نہیں

مست نگاہ سے تری عرق مئے طہور ہوں

تیرے جمال کی قسم اب کوئی تشنگی نہیں

وہ بھی میرے فراق میں میری طرح ہے مضطرب

بچھڑے زمانہ ہو گیا درد میں کچھ کمی نہیں

محو صلوٰۃ دائمی کون و مکاں سے بے خبر

سجدہ نہیں رکوع نہیں کوئی قیام ہی نہیں

تیرے حریم ناز کا اس کو ملا نہ راستہ

جس کی سیاہ رات میں اشکوں کی روشنی نہیں

یاد حبیب کے بغیر جتنا بھی وقت ہم جیے

اتنا ہی وقت بے گماں شامل زندگی نہیں

شمع شب فراق سے حال علیمؔ پوچھ لے

تو نے لگائی تھی جو آگ تیری قسم بجھی نہیں