be-KHudi mein ajab maza dekha

be-ḳhudī meñ 'ajab mazā dekhā

sirr-e-maḳhfī ko barmalā dekhā

aap hī gul hai aap hī bulbul

us ko har rañg-e-āshnā dekhā

kahtā hai aap samjhe bhī hai aap

us ko har shai meñ ḳhud-numā dekhā

sūrat-e-qais meñ huā majnūñ

shakl-e-lailā meñ ḳhushnumā dekhā

aap hī ban ke 'iisā aur murda

aap hī aap ko jilā dekhā

ho bar-afroḳhta ba-sūrat-e-sham'

shakl-e-parvāna maiñ jalā dekhā

sāġhar-e-be-ḳhudī se ho sarshār

ham ne har shai meñ ab ḳhudā dekhā

'ālam-e-'ishq meñ kaheñ kyā ham

jalva-e-husn jā-bajā dekhā

faiz-e-ḳhādim safī se ai aasim

us ko dekhā jise na thā dekhā

be-KHudi mein 'ajab maza dekha

sirr-e-maKHfi ko barmala dekha

aap hi gul hai aap hi bulbul

us ko har rang-e-ashna dekha

kahta hai aap samjhe bhi hai aap

us ko har shai mein KHud-numa dekha

surat-e-qais mein hua majnun

shakl-e-laila mein KHushnuma dekha

aap hi ban ke 'isa aur murda

aap hi aap ko jila dekha

ho bar-afroKHta ba-surat-e-sham'

shakl-e-parwana main jala dekha

saghar-e-be-KHudi se ho sarshaar

hum ne har shai mein ab KHuda dekha

'alam-e-'ishq mein kahen kya hum

jalwa-e-husn ja-baja dekha

faiz-e-KHadim safi se ai aasim

us ko dekha jise na tha dekha