ba-chashm-e-haqiqat jahan dekhta hun

ba-chashm-e-haqīqat jahāñ dekhtā huuñ

maiñ jānāñ kā jalva 'ayāñ dekhtā huuñ

ye jo kuchh ki zāhir hai sab nūr-e-haq hai

maiñ haq dekhtā huuñ jahāñ dekhtā huuñ

ba-har-rañg-o-har-shai-o-har-jā-vo-har-sū

tujhī ko maiñ jalva-kunāñ dekhtā huuñ

har ik qatra-e-bahr-e-kasrat meñ yaaro

maiñ dariyā-e-vahdat ravāñ dekhtā huuñ

jahāñ dekhtā huuñ maiñ jalva hai terā

tire ġhair ko maiñ ziyāñ dekhtā huuñ

ye tāsīr hai rāz-e-ulfat kā dil par

chuñ shādī-o-ġham ai kasāñ dekhtā huuñ

ba-juz zāt-e-murshid vahāñ kuchh na paayā

maiñ shaiḳh-o-barhaman yahāñ dekhtā huuñ

khulā mujh pe hai jab se sirr-e-haqīqat

maiñ apne ta.iiñ ḳhud gumāñ dekhtā huuñ

huā faiz-e-ḳhādim safī se ai aasim

ke sab shān-e-maulā 'ayāñ dekhtā huuñ

ba-chashm-e-haqiqat jahan dekhta hun

main jaanan ka jalwa 'ayan dekhta hun

ye jo kuchh ki zahir hai sab nur-e-haq hai

main haq dekhta hun jahan dekhta hun

ba-har-rang-o-har-shai-o-har-ja-wo-har-su

tujhi ko main jalwa-kunan dekhta hun

har ek qatra-e-bahr-e-kasrat mein yaro

main dariya-e-wahdat rawan dekhta hun

jahan dekhta hun main jalwa hai tera

tere ghair ko main ziyan dekhta hun

ye tasir hai raaz-e-ulfat ka dil par

chun shadi-o-gham ai kasan dekhta hun

ba-juz zat-e-murshid wahan kuchh na paya

main shaiKH-o-barhaman yahan dekhta hun

khula mujh pe hai jab se sirr-e-haqiqat

main apne tain KHud guman dekhta hun

hua faiz-e-KHadim safi se ai aasim

ke sab shan-e-maula 'ayan dekhta hun