بچشمِ حقیقت جہاں دیکھتا ہوں

بچشمِ حقیقت جہاں دیکھتا ہوں

میں جاناں کا جلوہ عیاں دیکھتا ہوں

یہ جو کچھ کہ ظاہر ہے سب نورِ حق ہے

میں حق دیکھتا ہوں جہاں دیکھتا ہوں

بہر رنگ و ہر شے و ہر جا و ہر سو

تجھی کو میں جلوہ کناں دیکھتا ہوں

ہر اک قطرۂ بحر کثرت میں یارو

میں دریائے وحدت رواں دیکھتا ہوں

جہاں دیکھتا ہوں میں جلوہ ہے تیرا

ترے غیر کو میں زیاں دیکھتا ہوں

یہ تاثیر ہے رازِ الفت کا دل پر

چوں شادی و غم ایک ساں دیکھتا ہوں

بجز ذاتِ مرشد وہاں کچھ نہ پایا

میں شیخ و برہمن یہاں دیکھتا ہوں

کھلا مجھ پہ ہی جب سے سر حقیقت

میں اپنے تئیں خود گماں دیکھتا ہوں

ہوا فیض خادم صفی سے یہ آثمؔ

کہ سب شانِ مولیٰ عیاں دیکھتا ہوں