پینے دو مجھے خون دل آرام یہی ہے

پینے دو مجھے خون دل آرام یہی ہے

میرے لیے بس بادۂ گلفام یہی ہے

پردرد مجھے رہنے دو آرام یہی ہے

گمنام مجھے چھوڑ دو بس نام یہی ہے

میں سب کو سمجھتا ہوں بدل اپنے سے بہتر

چھوٹا میں رہوں سب سے بڑا کام یہی ہے

پوجوں میں تجھی کو صنم اس دیر میں دن رات

ایمان یہی ہے مرا اسلام یہی ہے

جاں دے کے میں اب کوچۂ جاناں میں ہوں پہنچا

آغاز میں بس عشق کا انجام یہی ہے

نکہت سے تری زلف کی ہو جاتا ہوں بے خود

عالم میں مرے دل کے لیے دام یہی ہے

مر جاؤں گا عشق شہ خادم میں میں آثمؔ

میرے لیے اس دہر میں بس نام یہی ہے