faiz-baKHshi ki hai kya shan tere kucha mein

faiz-baḳhshī kī hai kyā shaan tire kūcha meñ

mor ban jaa.e sulaimān tire kūcha meñ

ruuh to rahtī hai har aan tire kūcha meñ

aa.e kyuuñ kar tan-e-be-jān tire kūcha meñ

aa nahīñ saktā vahāñ aur na bulā saktā huuñ

rāt-din rahtā hai bas dhyān tire kūcha meñ

kyā 'ajab hai ki bane sūrat-e-majnūñ lailā

chiir kar apnā garebān tire kūcha meñ

maskan-e-rūh mirā ba.ad-e-fanā hogā vahīñ

dafn ho yā na ho ai jaan tire kūcha meñ

ḳhaak par naqsh kaf-e-pā tire hove kyuuñ kar

farsh hai dīda-e-hairān tire kūcha meñ

chhoḌ darvāza tirā jaa.eñ kahāñ ham 'kHāmosh'

jaan to kar diye qurbān tire kūcha meñ

faiz-baKHshi ki hai kya shan tere kucha mein

mor ban jae sulaiman tere kucha mein

ruh to rahti hai har aan tere kucha mein

aae kyun kar tan-e-be-jaan tere kucha mein

aa nahin sakta wahan aur na bula sakta hun

raat-din rahta hai bas dhyan tere kucha mein

kya 'ajab hai ki bane surat-e-majnun laila

chir kar apna gareban tere kucha mein

maskan-e-ruh mera baad-e-fana hoga wahin

dafn ho ya na ho ai jaan tere kucha mein

KHak par naqsh kaf-e-pa tere howe kyun kar

farsh hai dida-e-hairan tere kucha mein

chhoD darwaza tera jaen kahan hum 'kHamosh'

jaan to kar diye qurban tere kucha mein