tumhaar ishq mein gar jaan ke dene se main aDta

tumhār 'ishq meñ gar jaan ke dene se maiñ aḌtā

koī din jī ke āḳhir maut se marnā hī phir paḌtā

kahāñ ye 'ishq kā marnā kahāñ vo maut sar paḌnā

yahāñ ab rūh-e-qudsī hoñ vahāñ zer-e-zamīñ saḌnā

ziyārat-gāh-e-'ālam aaj hai yaaro mazār apnā

kaho hāsid ko tū bhī saath mere aa yahāñ gaḌnā

agar parvāna bulbul kī tarah marne se tham rahtā

ye ronā sham.a ko us ke liye tā-sub.h kyuuñ paḌtā

ye sañgīnī-o-subkī terī vā'iz sab pe khul jaatī

tarāzū-e-mohabbat meñ agar ā-kar ke tū tuḌtā

'niyāz' āḳhir tirā dil taḳht-e-rabbul-'ālamīñ hotā

ḳhas-o-ḳhāshāk ġhaflat se agar ye ḳhuub sā jhaḌtā

tumhaar 'ishq mein gar jaan ke dene se main aDta

koi din ji ke aaKHir maut se marna hi phir paDta

kahan ye 'ishq ka marna kahan wo maut sar paDna

yahan ab ruh-e-qudsi hon wahan zer-e-zamin saDna

ziyarat-gah-e-'alam aaj hai yaro mazar apna

kaho hasid ko tu bhi sath mere aa yahan gaDna

agar parwana bulbul ki tarah marne se tham rahta

ye rona shama ko us ke liye ta-subh kyun paDta

ye sangini-o-subki teri wa'iz sab pe khul jati

taraazu-e-mohabbat mein agar aa-kar ke tu tuDta

'niyaz' aaKHir tera dil taKHt-e-rabbul-'alamin hota

KHas-o-KHashak ghaflat se agar ye KHub sa jhaDta