dikhta hai shab-o-roz tamasha mere dil mein

dikhtā hai shab-o-roz tamāsha mere dil meñ

kā'ba mere dil meñ hai kalīsā mere dil meñ

rahtā huuñ kisī but ke tasavvur meñ shab-o-roz

kyā khich gayā us shoḳh kā naqsha mire dil meñ

jo ḳhud se nikaltā huuñ to benām-o-nishāñ huuñ

phir luuT ke aatā hai sarāpā mire dil meñ

haq kī maiñ parastish karūñ yā pīr-parastī

ye donoñ baham rahte haiñ yakjā mire dil meñ

us nūr-e-samāvāt ke anvār se har dam

bahtā hai 'ajab nuur kā dariyā mire dil meñ

avval vahī ākHir vahī zāhir vahī bātin

un sab kā hai vo barzaḳh-e-kubrā mire dil meñ

jab ġhaib huuñ ḳhud to huzūrī ho ḳhudā se

banda huuñ magar rahtā hai allāh mire dil meñ

us kā ruḳh-e-zebā merī āñkhoñ meñ basā hai

vo husn-e-ḳhudā-dād samāyā mire dil meñ

'saudā-gar' 'āshiq yahī kahtā hai shab-o-roz

hāfiz mire siine meñ hai mirzā mire dil meñ

dikhta hai shab-o-roz tamasha mere dil mein

ka'ba mere dil mein hai kalisa mere dil mein

rahta hun kisi but ke tasawwur mein shab-o-roz

kya khich gaya us shoKH ka naqsha mere dil mein

jo KHud se nikalta hun to benam-o-nishan hun

phir luT ke aata hai sarapa mere dil mein

haq ki main parastish karun ya pir-parasti

ye donon baham rahte hain yakja mere dil mein

us nur-e-samawat ke anwar se har dam

bahta hai 'ajab nur ka dariya mere dil mein

awwal wahi aakHir wahi zahir wahi baatin

un sab ka hai wo barzaKH-e-kubra mere dil mein

jab ghaib hun KHud to huzuri ho KHuda se

banda hun magar rahta hai allah mere dil mein

us ka ruKH-e-zeba meri aankhon mein basa hai

wo husn-e-KHuda-dad samaya mere dil mein

'sauda-gar' 'ashiq yahi kahta hai shab-o-roz

hafiz mere sine mein hai mirza mere dil mein