دکھتا ہے شب و روز تماشہ میرے دل میں

دکھتا ہے شب و روز تماشہ میرے دل میں

کعبہ میرے دل میں ہے کلیسا میرے دل میں

رہتا ہوں کسی بت کے تصور میں شب و روز

کیا کھچ گیا اس شوخ کا نقشہ مرے دل میں

جو خود سے نکلتا ہوں تو بے نام و نشاں ہوں

پھر لوٹ کے آتا ہے سراپا مرے دل میں

حق کی میں پرستش کروں یا پیر پرستی

یہ دونوں بہم رہتے ہیں یکجا مرے دل میں

اس نور سموات کے انوار سے ہر دم

بہتا ہے عجب نور کا دریا مرے دل میں

اول وہی آخر وہی ظاہر وہی باطن

ان سب کا ہے وہ برزخ کبریٰ مرے دل میں

جب غیب ہوں خود تو حضوری ہو خدا سے

بندہ ہوں مگر رہتا ہے اللہ مرے دل میں

اس کا رخ زیبا میری آنکھوں میں بسا ہے

وہ حسن خدا داد سمایا مرے دل میں

سوداگرؔ عاشق یہی کہتا ہے شب و روز

حافظ مرے سینے میں ہے مرزا مرے دل میں