جنون عشق جتنا کفر ساماں ہوتا جاتا ہے

جنون عشق جتنا کفر ساماں ہوتا جاتا ہے

نگاہِ دیدہ ور میں نزدِ ایماں ہوتا جاتا ہے

کسی پردہ نشیں کی آمد و شد کی بہاریں ہیں

ہمارا خانۂ دل بھی گلستاں ہوتا جاتا ہے

تمہارے ہجر کے صدقے تمہارے وصل کے قرباں

یہ دل بھی بے نیازِ کفر و ایماں ہوتا جاتا ہے

خدا رکھے وہ نظریں جس قدر غم دیتی جاتی ہیں

مرا دل اور شاداں اور شاداں ہوتا جاتا ہے

ہزاروں رنگ ہیں جب ایک بے رنگی کے پردے میں

تو بے رنگی کا عالم کیوں نمایاں ہوتا جاتا ہے

میں جتنا بھی بیاں کرتا ہوں اپنا رازِ غم اے رازؔ

یہ میرا رازِ غم اتنا ہی پنہاں ہوتا جاتا ہے