ہم پی کے جو جامِ مئے ساقی بدمست چلے میخانے سے

ہم پی کے جو جامِ مئے ساقی بدمست چلے میخانے سے

اپنے سے تو ہم نے کچھ نہ کہا ہر بات کہی بیگانے سے

تو آ کے حرم سے اے زاہد اب سوئے بتاں کیوں جاتا ہے

ہم سمت حرم اب جاتے ہیں جب آ بھی چکے بت خانے سے

ہے آنکھ ہی تیری میخانہ ہے تیری نظر ہی پیمانہ

ہم کو جو پلاتا ہے ساقی للہ اسی پیمانے سے

مدت میں بہاریں آئی ہیں عشرت کی گھٹائیں چھائی ہیں

آئے ہو تو اب کچھ نہ ٹھہرو جاؤ نہ مرے کاشانے سے

یہ اہلِ خرد کیا سمجھیں گے یہ اہل نظر کیا جانیں گے

اے رازؔ ہمارا راز ہے کیا پوچھو یہ کسی دیوانے سے