parda-e-husn mein chhupa hun main

parda-e-husn meñ chhupā huuñ maiñ

apnī sūrat pe mubtalā huuñ meñ

aapī 'āshiq huuñ aap hī ma.ashūq

aapī dard aap hī davā huuñ maiñ

aapī huuñ qais-e-kHasta-o-dil-resh

aapī laila-e-dil-rubā huuñ maiñ

hai jamāl-o-jalāl merī shaan

garche donoñ se māvarā huuñ maiñ

koī mere sivā nahīñ maujūd

'arsh huuñ farsh huuñ samā huuñ maiñ

mujh se sab māñgte haiñ apnī murād

sab kā maqsūd-o-mudda'ā huuñ maiñ

huuñ barī vahm-o-fahm se tere

kyā batā.ūñ 'turāb' kyā huuñ maiñ

parda-e-husn mein chhupa hun main

apni surat pe mubtala hun mein

aapi 'ashiq hun aap hi mashuq

aapi dard aap hi dawa hun main

aapi hun qais-e-kHasta-o-dil-resh

aapi laila-e-dil-ruba hun main

hai jamal-o-jalal meri shan

garche donon se mawara hun main

koi mere siwa nahin maujud

'arsh hun farsh hun sama hun main

mujh se sab mangte hain apni murad

sab ka maqsud-o-mudda'a hun main

hun bari wahm-o-fahm se tere

kya bataun 'turab' kya hun main