iltija kis se karun tere siwa

iltijā kis se karūñ tere sivā

yā ilāhī kar mirī hājat-ravā

dard merā tujh se kuchh pinhāñ nahīñ

hai tirā lutf-o-karam us kī davā

fazl se apne mujhe kar de ġhanī

tū ġhanī hai maiñ faqīr-e-be-navā

mujh ko is 'ālam se kar de be-niyāz

duur ho dil se mire hirs-o-havā

ātish-e-dozaḳh se aiman rakh mujhe

ho mirī qismat meñ jannat kī huā

'umr baaqī yaad meñ terī kaTe

sohbat-e-bad se rakhūñ nit inzivā

kalimat-ul-haq ḳhalq se kahtā rahūñ

go kisī par talḳh ho juuñ ailvā

sar pe sab us ke raheñ pīrān-e-pīr

sidq se jis ne qadam merā chhuā

dil meñ yuuñ rañg-e-fanā-o-faqr de

tan pe hai jaise libās-e-gerua

tujh se hai ummīd baḳhshish kī mujhe

hai tirā mahbūb merā peshvā

ai ḳhudā tujh ko mohammad kī qasam

baḳhsh de mere fe'l-e-zasht-o-nā-ravā

ḳhātima bil-ḳhair mujh 'aasī kā ho

rahm ke laa.eq huuñ ab buDDhā huā

gor mujh ko dekh ke kahne lage

hai bahishtī ai farishto ye muā

hashr meñ jhaT-paT vahāñ pahuñche 'turāb'

ho jahāñ qaa.em mohammad kā lavā

iltija kis se karun tere siwa

ya ilahi kar meri hajat-rawa

dard mera tujh se kuchh pinhan nahin

hai tera lutf-o-karam us ki dawa

fazl se apne mujhe kar de ghani

tu ghani hai main faqir-e-be-nawa

mujh ko is 'alam se kar de be-niyaz

dur ho dil se mere hirs-o-hawa

aatish-e-dozaKH se aiman rakh mujhe

ho meri qismat mein jannat ki hua

'umr baqi yaad mein teri kaTe

sohbat-e-bad se rakhun nit inziwa

kalimat-ul-haq KHalq se kahta rahun

go kisi par talKH ho jun ailwa

sar pe sab us ke rahen piran-e-pir

sidq se jis ne qadam mera chhua

dil mein yun rang-e-fana-o-faqr de

tan pe hai jaise libas-e-gerua

tujh se hai ummid baKHshish ki mujhe

hai tera mahbub mera peshwa

ai KHuda tujh ko mohammad ki qasam

baKHsh de mere fe'l-e-zasht-o-na-rawa

KHatima bil-KHair mujh 'asi ka ho

rahm ke laeq hun ab buDDha hua

gor mujh ko dekh ke kahne lage

hai bahishti ai farishto ye mua

hashr mein jhaT-paT wahan pahunche 'turab'

ho jahan qaem mohammad ka lawa