shaiKH-ji tashrif yun bahr-e-ziyarat le chale

shaiḳh-jī tashrīf yuuñ bahr-e-ziyārat le chale

lab pe tauba un butoñ kī dil meñ ulfat le chale

laa.e the mulk-e-adam se saath apne naqd-e-dil

ab yahāñ se us ke badle dāġh-e-furqat le chale

zo.af kaafī hai mujhe sahrā-navardī meñ junūñ

kaun apne sar se bār-e-tab-o-tāqat le chale

dīn-o-īmāñ nazr de ke mahfil-e-jānāñ se ham

dil ke dil hī meñ rahe armāñ ye hasrat le chale

qatl kuchh āshiq hue maqtal meñ us ke haath se

kuchh phire māyūs aur shauq-e-shahādat le chale

kuchh maza tanhā.ī meñ sahrā-navardī kā nahīñ

haañ chalūñ gar saath apne josh-e-vahshat le chale

niklā mai-ḳhāna se jab 'aughaT' to pūchhā 'shāh-jī'

ye baġhal meñ kyā dabā.e aap hazrat le chale

shaiKH-ji tashrif yun bahr-e-ziyarat le chale

lab pe tauba un buton ki dil mein ulfat le chale

lae the mulk-e-adam se sath apne naqd-e-dil

ab yahan se us ke badle dagh-e-furqat le chale

zoaf kafi hai mujhe sahra-nawardi mein junun

kaun apne sar se bar-e-tab-o-taqat le chale

din-o-iman nazr de ke mahfil-e-jaanan se hum

dil ke dil hi mein rahe arman ye hasrat le chale

qatl kuchh aashiq hue maqtal mein us ke hath se

kuchh phire mayus aur shauq-e-shahadat le chale

kuchh maza tanhai mein sahra-nawardi ka nahin

han chalun gar sath apne josh-e-wahshat le chale

nikla mai-KHana se jab 'aughaT' to puchha 'shah-ji'

ye baghal mein kya dabae aap hazrat le chale