kahun kis se ki ab kya kya hue wahm-o-guman mujhko

kahūñ kis se ki ab kyā kyā hue vahm-o-gumāñ mujh ko

nasīhat kar rahā thā aaj merā rāz-dāñ mujh ko

banāyā ḳhud-ġharz parde ne tere jān-e-jāñ mujh ko

na hotā varna apne aap par terā gumāñ mujh ko

na ho jaa.e kahīñ taqdīm yā tāḳhīr lafzoñ meñ

sunā de ai mire qāsid zarā merā bayāñ mujh ko

hikāyat bar-sabīl-e-tazkira hai qais-o-vāmiq kī

magar kahnā na aa.ī aah apnī dāstāñ mujh ko

tumhār husn meñ jazba thā ḳhud 'ishq-e-āfrīnī kā

vagarna da.ave ulfat kī himmat thī kahāñ mujh ko

mirī 'āshiq-mizājī aur us par barq kī shoḳhī

bhalā us vaqt kyā hotā ḳhayāl-e-āshiyāñ mujh ko

mirī jānib se āḳhir un ke dil meñ bhī ġhubār aayā

milā.egā kahāñ tak ḳhaak meñ ai āsmāñ mujh ko

kahāñ se zarf lā.ūñgā ki tāqat ghaTtī jaatī hai

chhupā de qabr meñ kaash ab mirā rāz-e-nihāñ mujh ko

yakāyak baat karte karte ruk jaatā hai dam merā

sikhāyā terī luknat ne ye andāz-e-bayāñ mujh ko

madārik nuqta-e-mauhūm par hai daur-e-'ālam kā

zamāna kyuuñ miTātā hai samajh kar nā-tavāñ mujh ko

qafas mujh ḳhānumāñ barbād se chhūTe kahāñ mumkin

ye qismat ne diyā hai yādgār-e-āshiyāñ mujh ko

kaleja muñh ko aatā hai jo kahnā chāhtā huuñ kuchh

magar kyā raaz hai us par bhī shauq-e-bayāñ mujh ko

garebāñ giir ho jātīñ hazāroñ hasrateñ dil kī

magar ye ḳhair guzrī aa.ī marg-e-nā-gahāñ mujh ko

jo apnā mo'taqid ho shikvā us se kyā karūñ 'shākir'

samajhtā hai harīs-e-lazzat-e-ġham āsmāñ mujh ko

kahun kis se ki ab kya kya hue wahm-o-guman mujh ko

nasihat kar raha tha aaj mera raaz-dan mujh ko

banaya KHud-gharz parde ne tere jaan-e-jaan mujh ko

na hota warna apne aap par tera guman mujh ko

na ho jae kahin taqdim ya taKHir lafzon mein

suna de ai mere qasid zara mera bayan mujh ko

hikayat bar-sabil-e-tazkira hai qais-o-wamiq ki

magar kahna na aai aah apni dastan mujh ko

tumhaar husn mein jazba tha KHud 'ishq-e-afrini ka

wagarna dawe ulfat ki himmat thi kahan mujh ko

meri 'ashiq-mizaji aur us par barq ki shoKHi

bhala us waqt kya hota KHayal-e-ashiyan mujh ko

meri jaanib se aaKHir un ke dil mein bhi ghubar aaya

milaega kahan tak KHak mein ai aasman mujh ko

kahan se zarf launga ki taqat ghaTti jati hai

chhupa de qabr mein kash ab mera raaz-e-nihan mujh ko

yakayak baat karte karte ruk jata hai dam mera

sikhaya teri luknat ne ye andaz-e-bayan mujh ko

madarik nuqta-e-mauhum par hai daur-e-'alam ka

zamana kyun miTata hai samajh kar na-tawan mujh ko

qafas mujh KHanuman barbaad se chhuTe kahan mumkin

ye qismat ne diya hai yaadgar-e-ashiyan mujh ko

kaleja munh ko aata hai jo kahna chahta hun kuchh

magar kya raaz hai us par bhi shauq-e-bayan mujh ko

gareban gir ho jatin hazaron hasraten dil ki

magar ye KHair guzri aai marg-e-na-gahan mujh ko

jo apna mo'taqid ho shikwa us se kya karun 'shakir'

samajhta hai haris-e-lazzat-e-gham aasman mujh ko