taDapte lauTte sina-sipar hote hain bistar par

taḌapte lauTte sīna-sipar hote haiñ bistar par

dahān-e-zaḳhm kā har daañt hai qātil ke ḳhanjar par

ishāra abrū-e-ḳham-dār dhamkātā hai qātil kā

galā rakh deñge aa kar ’āshiq-e-jāñbāz ḳhanjar par

jise chāheñ kareñ rusvā usī kā naam ulfat hai

badī kā chāhiye hargiz gumāñ ai dil na dilbar par

ḳhudā ke sāmne kah dūñgā jo kuchh dil pe guzrī hai

na likheñ kātib-e-a.amāl qissa merā daftar par

tire bīmār-e-ġham kī haal par dushman bhī rote haiñ

shab-e-furqat basar kī karvaTeñ le-le ke bistar par

taḌaptā hai machaltā hai jahāñ koī hasīñ dekhā

nahīñ chaltā hai kuchh qaabū dil-e-be-tāb-o-muztar par

tire dariyā-e-ulfat meñ paḌe yuuñ jaan ke laale

bhañvar se jis tarah uchhle koī paanī kī chādar par

hazāroñ kar diye ik vaar meñ chū rañg-e-zālim ne

safā.ī is tarah aa.ī mire qātil ke ḳhanjar par

lagā ik vaar ḳhanjar kā ki ho jaaye subuk-doshī

tirā ehsān ai qātil rahegā ye mire sar par

vo ā.īna muqābil rakh ke ham se muñh milāte haiñ

muqaddar ko hamāre fauq hāsil hai sikandar par

marātib vo diye haiñ ahmad-e-muḳhtār ko haq ne

liye rahte the jibrīl-e-amīñ qadmoñ ko shahpar par

ġhurūr-e-husn se ai 'sharaf' dhamkāte haiñ 'āshiq ko

javānī kā ye 'ālam hai tule rahte haiñ vo shar par

taDapte lauTte sina-sipar hote hain bistar par

dahan-e-zaKHm ka har dant hai qatil ke KHanjar par

ishaara abru-e-KHam-dar dhamkata hai qatil ka

gala rakh denge aa kar ’ashiq-e-jaanbaz KHanjar par

jise chahen karen ruswa usi ka nam ulfat hai

badi ka chahiye hargiz guman ai dil na dilbar par

KHuda ke samne kah dunga jo kuchh dil pe guzri hai

na likhen katib-e-amal qissa mera daftar par

tere bimar-e-gham ki haal par dushman bhi rote hain

shab-e-furqat basar ki karwaTen le-le ke bistar par

taDapta hai machalta hai jahan koi hasin dekha

nahin chalta hai kuchh qabu dil-e-be-tab-o-muztar par

tere dariya-e-ulfat mein paDe yun jaan ke lale

bhanwar se jis tarah uchhle koi pani ki chadar par

hazaron kar diye ek war mein chu rang-e-zalim ne

safai is tarah aai mere qatil ke KHanjar par

laga ek war KHanjar ka ki ho jaye subuk-doshi

tera ehsan ai qatil rahega ye mere sar par

wo aaina muqabil rakh ke hum se munh milate hain

muqaddar ko hamare fauq hasil hai sikandar par

maraatib wo diye hain ahmad-e-muKHtar ko haq ne

liye rahte the jibril-e-amin qadmon ko shahpar par

ghurur-e-husn se ai 'sharaf' dhamkate hain 'ashiq ko

jawani ka ye 'alam hai tule rahte hain wo shar par