dost aae ki koi dost ka paigham aae

dost aa.e ki koī dost kā paiġhām aa.e

aa.e jis tarah se bīmār ko ārām aa.e

ḳhum chhupā.e hue baġhloñ meñ tahī-jām aa.e

sāqiyā dekh tire mai-kada-e-āshām aa.e

abr chhāyā hai havā mast hai gulshan ḳhāmosh

kaash us vaqt vo hāthoñ meñ liye jaam aa.e

chhoḌ de taaki maiñ uThā jā.ūñ bharī mahfil se

ham-nashīñ yaad mujhe vasl ke ayyām aa.e

shaan hai ye bhī tirī bazm-e-tarab ki saaqī

koī badmast ho pī kar koī nākām aa.e

us ke kūche se mire na.ash liye jaate haiñ

koī qātil se ye kah do ki sar-e-bām aa.e

vāda-e-hūr pe honā na 'tabassum' masrūr

dekhnā dil meñ na aisī havas-e-ḳhām aa.e

dost aae ki koi dost ka paigham aae

aae jis tarah se bimar ko aaram aae

KHum chhupae hue baghlon mein tahi-jam aae

saqiya dekh tere mai-kada-e-asham aae

abr chhaya hai hawa mast hai gulshan KHamosh

kash us waqt wo hathon mein liye jam aae

chhoD de taki main uTha jaun bhari mahfil se

ham-nashin yaad mujhe wasl ke ayyam aae

shan hai ye bhi teri bazm-e-tarab ki saqi

koi badmast ho pi kar koi nakaam aae

us ke kuche se mere nash liye jate hain

koi qatil se ye kah do ki sar-e-baam aae

wada-e-hur pe hona na 'tabassum' masrur

dekhna dil mein na aisi hawas-e-KHam aae