qaim thi yun to dard ki mahfil jagah jagah

qaa.im thī yuuñ to dard kī mahfil jagah jagah

ham hī sunā sake na ġham-e-dil jagah jagah

tūfān-e-mauj-kHez ke ḳhūgar sambhal sambhal

haa.il maiñ terī raah meñ sāhil jagah jagah

dil har maqām-e-shauq se aage nikal gayā

dāman ko khīñchtī rahī manzil jagah jagah

har naqsh-e-pā thā mere liye terā āstāñ

aa.ī nazar mujhe tirī mahfil jagah jagah

shān-e-karam ko 'uzr-e-talab bhī thā nā-gavār

phailā ke haath rah gayā saa.el jagah jagah

har ik qadam par Thokareñ khāne ke bāvajūd

khaa.e fareb vā’da-e-bātil jagah jagah

hai josh-e-girya mauj-e-‘tabassum’ se ham-kanār

hote haiñ husn-o-'ishq muqābil jagah jagah

qaim thi yun to dard ki mahfil jagah jagah

hum hi suna sake na gham-e-dil jagah jagah

tufan-e-mauj-kHez ke KHugar sambhal sambhal

hail main teri rah mein sahil jagah jagah

dil har maqam-e-shauq se aage nikal gaya

daman ko khinchti rahi manzil jagah jagah

har naqsh-e-pa tha mere liye tera aastan

aai nazar mujhe teri mahfil jagah jagah

shan-e-karam ko 'uzr-e-talab bhi tha na-gawar

phaila ke hath rah gaya sael jagah jagah

har ek qadam par Thokaren khane ke bawajud

khae fareb wa’da-e-baatil jagah jagah

hai josh-e-girya mauj-e-‘tabassum’ se ham-kanar

hote hain husn-o-'ishq muqabil jagah jagah