tujhko hi faqat hamd saza-war hai ya-rab

tujh ko hī faqat hamd sazā-vār hai yā-rab

ma.abūd ḳhalā.iq hai tū ġhaffār hai yā-rab

yaktā hai tū aur zāt-e-ahad phir ye tamāsha

bas tuuhī jahāñ dekhiye do chaar hai yārab

'ālam hai vo hairat-kada ā.īne kī mānind

hairān har ik ġhāfil-o-hushyār hai yā rab

kahte haiñ use chashm-e-basīrat ki vo dekhe

maz.har meñ terī zaat kā iz.hār hai yā-rab

vahdat meñ ye kasrat ke tamāshe kā mu’amma

khultā nahīñ is tarah kā asrār hai yā-rab

behosh huā nashsha-e-ulfat meñ jo tere

haiñ hosh isī ko vo hushiyār hai yā-rab

rahmat kā bharosā hai tirī varna jahāñ meñ

jis shaḳhs ko dekhā vo gunahgār hai yā-rab

dekhūñ to maiñ hairāñ huuñ ki kyūñki tujhe dekhūñ

merī hī ḳhudī mān’e-e-dīdār hai yā-rab

mujh se bhī siyāh-kār ko baḳhshe to 'ajab kyā

mustaġhnī-e-zātī tirī sarkār hai yā-rab

mansūr kī mānind kabhī maiñ bhī chaḌhūñgā

ziina hī tire baam kā kirdār hai yā-rab

rahmat kī nazar us pe bhī ho jaaye kisī roz

ye 'meher' tamannā-e-dīdār hai yā-rab

tujh ko hi faqat hamd saza-war hai ya-rab

mabud KHalaiq hai tu ghaffar hai ya-rab

yakta hai tu aur zat-e-ahad phir ye tamasha

bas tuhi jahan dekhiye do chaar hai yarab

'alam hai wo hairat-kada aaine ki manind

hairan har ek ghafil-o-hushyar hai ya rab

kahte hain use chashm-e-basirat ki wo dekhe

mazhar mein teri zat ka izhaar hai ya-rab

wahdat mein ye kasrat ke tamashe ka mu’amma

khulta nahin is tarah ka asrar hai ya-rab

behosh hua nashsha-e-ulfat mein jo tere

hain hosh isi ko wo hushiyar hai ya-rab

rahmat ka bharosa hai teri warna jahan mein

jis shaKHs ko dekha wo gunahgar hai ya-rab

dekhun to main hairan hun ki kyunki tujhe dekhun

meri hī KHudi man’e-e-didar hai ya-rab

mujh se bhi siyah-kar ko baKHshe to 'ajab kya

mustaghni-e-zati teri sarkar hai ya-rab

mansur ki manind kabhi main bhi chaDhunga

zina hi tere baam ka kirdar hai ya-rab

rahmat ki nazar us pe bhi ho jaye kisi roz

ye 'meher' tamanna-e-didar hai ya-rab