تجھ کو ہی فقط حمد سزاوار ہے یا رب

تجھ کو ہی فقط حمد سزاوار ہے یا رب

معبود خلائق ہے تو غفار ہے یا رب

یکتا ہے تو اور ذات احد پھر یہ تماشہ

بس توہی جہاں دیکھیے دو چار ہے یا رب

عالم ہے وہ حیرت کدہ آئینے کی مانند

حیران ہر اک غافل و ہشیار ہے یا رب

کہتے ہیں اسے چشم بصیرت کہ وہ دیکھے

مظہر میں تیری ذات کا اظہار ہے یا رب

وحدت میں یہ کثرت کے تماشے کا معمہ

کھلتا نہیں اس طرح کا اسرار ہے یا رب

بے ہوش ہوا نشہ الفت میں جو تیرے

ہیں ہوش اسی کو وہ ہشیار ہے یا رب

رحمت کا بھروسا ہے تری ورنہ جہاں میں

جس شخص کو دیکھا وہ گنہ گار ہے یا رب

دیکھوں تو میں حیراں ہوں کہ کیونکہ تجھے دیکھوں

میری ہی خودی مانع دیدار ہے یا رب

مجھ سے بھی سیاہ کار کو بخشے تو عجب کیا

مستغنیٔ ذاتی تری سرکار ہے یا رب

منصور کی مانند کبھی میں بھی چڑھوں گا

زینہ ہی ترے بام کا کردار ہے یا رب

رحمت کی نظر اس پہ بھی ہو جائے کسی روز

یہ مہرؔ تمنائے دیدار ہے یا رب