jala dun ranj ke KHirman ko wo sharara hun

jalā duuñ rañj ke ḳhirman ko vo sharāra huuñ

sip.har josh-e-masarrat kā maiñ sitāra huuñ

na jis kī thaah mile bahar-e-be-kanār huuñ maiñ

kināra jis se kare 'aql vo kināra huuñ

maiñ ḳhud zamīn-o-zamān huuñ maiñ aap kaun-o-makāñ

ye kā.ināt nahīñ maiñ hī sab nazāra huuñ

mere hī saañs haiñ ai dost āñdhiyāñ kaisī

pasīna bahr hai go nuur kā sharāra huuñ

jigar ho chaak falak kā zamīñ ko jumbish ho

kHurosh-o-josh meñ dam-bhar jo āshkāra huuñ

valī huuñ murshid-e-kāmil aur nabī huuñ maiñ

nahīñ maiñ sirr-e-ḳhafī balki āshkārā huuñ

mirā hī husn huā mun.akis hasīnoñ meñ

maiñ mehr-e-mashriq-e-kHūbī huuñ māh-pāra huuñ

bharā huā hai rag-o-pai meñ mire naġhma dost

hamesha bajtā hī rahtā huuñ vo do taara huuñ

ġhizā-e-rūh huuñ maiñ aur lutf-e-mausīqī

sitārah-o-bain-o-duf-o-chañg aur chikārā huuñ

mujhī se nasr hai nāsir kī nazm nāzim kī

suḳhan meñ lutf huuñ tashbīh-o-isti'āra huuñ

mujhī ko kahte haiñ aksīr-e-kīmiyā gar sab

koī na maar sakā jis ko maiñ vo paara huuñ

talāsh kis kī ho maiñ ḳhud huuñ manzil-e-maqsūd

rachā huuñ diid kī qur.ān kā sipārā huuñ

suḳhan meñ rahtā huuñ maġhz-e-suḳhan kī tarah se 'meher'

maiñ gosh sāme’-e-dānā kā goshvāra huuñ

jala dun ranj ke KHirman ko wo sharara hun

siphar josh-e-masarrat ka main sitara hun

na jis ki thah mile bahar-e-be-kanar hun main

kinara jis se kare 'aql wo kinara hun

main KHud zamin-o-zaman hun main aap kaun-o-makan

ye kainat nahin main hi sab nazara hun

mere hi sans hain ai dost aandhiyan kaisi

pasina bahr hai go nur ka sharara hun

jigar ho chaak falak ka zamin ko jumbish ho

kHurosh-o-josh mein dam-bhar jo aashkara hun

wali hun murshid-e-kaamil aur nabi hun main

nahin main sirr-e-KHafi balki aashkara hun

mera hi husn hua munakis hasinon mein

main mehr-e-mashriq-e-kHubi hun mah-para hun

bhara hua hai rag-o-pai mein mere naghma dost

hamesha bajta hi rahta hun wo do tara hun

ghiza-e-ruh hun main aur lutf-e-mausiqi

sitarah-o-bain-o-duf-o-chang aur chikara hun

mujhi se nasr hai nasir ki nazm nazim ki

suKHan mein lutf hun tashbih-o-isti'ara hun

mujhi ko kahte hain aksir-e-kimiya gar sab

koi na mar saka jis ko main wo para hun

talash kis ki ho main KHud hun manzil-e-maqsud

racha hun did ki quran ka sipara hun

suKHan mein rahta hun maghz-e-suKHan ki tarah se 'meher'

main gosh same’-e-dana ka goshwara hun