haram-e-dil mein makin tha mujhe malum na tha

haram-e-dil meñ makīñ thā mujhe ma.alūm na thā

vo rag-e-jāñ se qarīñ thā mujhe ma.alūm na thā

maiñ judā.ī meñ taḌaptā thā ḳhatā thī merī

us kā har naaz hasīñ thā mujhe ma.alūm na thā

'umr-bhar zohra-jabīnoñ kā bharā dam be-kār

maiñ bhī ḳhud māh-jabīñ thā mujhe ma.alūm na thā

maiñ samajhtā thā ki vo duur hai mujh se lekin

mujh se bhī mere qarīñ thā mujhe ma.alūm na thā

dil se parda jo uThā ho ga.iiñ raushan āñkheñ

dil meñ vo parda-nashīñ thā mujhe ma.alūm na thā

maiñ kahīñ huuñ vo kahīñ hai ye gumāñ thā mujh ko

maiñ jahāñ thā vo vahīñ thā mujhe ma.alūm na thā

dīn-o-duniyā kī talab kyā thī tilism-e-bātil

ḳhud maiñ duniyā thā maiñ diiñ thā mujhe ma.alūm na thā

'umr-bhar jis ke tajassus meñ rahā sar-gardāñ

aap hī meñ vo hasīñ thā mujhe ma.alūm na thā

kHvāhish-e-ḳhuld-e-barīñ hī thī jhamelā ‘nirmal’

ḳhud hī dil ḳhuld-e-barīñ thā mujhe ma.alūm na thā

haram-e-dil mein makin tha mujhe malum na tha

wo rag-e-jaan se qarin tha mujhe malum na tha

main judai mein taDapta tha KHata thi meri

us ka har naz hasin tha mujhe malum na tha

'umr-bhar zohra-jabinon ka bhara dam be-kar

main bhi KHud mah-jabin tha mujhe malum na tha

main samajhta tha ki wo dur hai mujh se lekin

mujh se bhi mere qarin tha mujhe malum na tha

dil se parda jo uTha ho gain raushan aankhen

dil mein wo parda-nashin tha mujhe malum na tha

main kahin hun wo kahin hai ye guman tha mujh ko

main jahan tha wo wahin tha mujhe malum na tha

din-o-duniya ki talab kya thi tilism-e-baatil

KHud main duniya tha main din tha mujhe malum na tha

'umr-bhar jis ke tajassus mein raha sar-gardan

aap hi mein wo hasin tha mujhe malum na tha

kHwahish-e-KHuld-e-barin hi thi jhamela ‘nirmal’

KHud hi dil KHuld-e-barin tha mujhe malum na tha