kabhi saya kabhi parda kabhi jalwa samajhte hain

kabhī saaya kabhī parda kabhī jalva samajhte haiñ

na jaane log tujh ko aur bhī kyā kyā samjhe haiñ

vo koī aur haiñ duniyā ko jo duniyā samajhte haiñ

jo raushan-dil haiñ vo us ko tamāsha sā samajhte haiñ

kabhī gulshan samajhte haiñ kabhī sahrā samajhte haiñ

tamāsha hai ye 'ālam ham use kyā kyā samajhte haiñ

vo jalva hai to yaktā ham jise husn-e-tayaqqun se

kabhī but-ḳhāna kahte haiñ kabhī ka.aba samajhte haiñ

haqīqat to bas itnī hai haqīqat ḳhud haqīqat hai

ta.ajjub hai use ahl-e-ġharaz kyā kyā samajhte haiñ

gulistāñ ban ga.iiñ āñkheñ kisī gul-ruḳh ke jalve se

jo kāñTā hai use bhī ham gul-e-ra.anā samajhte haiñ

nujūm-o-kahkashāñ kyā haiñ ġhubār-e-jāda-e-manzil

mah-o-ḳhurshīd ko ham apnā naqsh-e-pā samajhte haiñ

ye husn-e-zan hai husn-e-fikr hai husn-e-taḳhyyul hai

jo gul ko jām-e-mai ġhunche ko ham miinā samajhte haiñ

kabhī qatre ko bhī dariyā samajh kar Duub jaate haiñ

magar nirmal ham ab dariyā ko bhī qatra samajhte haiñ

kabhi saya kabhi parda kabhi jalwa samajhte hain

na jaane log tujh ko aur bhi kya kya samjhe hain

wo koi aur hain duniya ko jo duniya samajhte hain

jo raushan-dil hain wo us ko tamasha sa samajhte hain

kabhi gulshan samajhte hain kabhi sahra samajhte hain

tamasha hai ye 'alam hum use kya kya samajhte hain

wo jalwa hai to yakta hum jise husn-e-tayaqqun se

kabhi but-KHana kahte hain kabhi kaba samajhte hain

haqiqat to bas itni hai haqiqat KHud haqiqat hai

tajjub hai use ahl-e-gharaz kya kya samajhte hain

gulistan ban gain aankhen kisi gul-ruKH ke jalwe se

jo kanTa hai use bhi hum gul-e-rana samajhte hain

nujum-o-kahkashan kya hain ghubar-e-jada-e-manzil

mah-o-KHurshid ko hum apna naqsh-e-pa samajhte hain

ye husn-e-zan hai husn-e-fikr hai husn-e-taKHyyul hai

jo gul ko jam-e-mai ghunche ko hum mina samajhte hain

kabhi qatre ko bhi dariya samajh kar Dub jate hain

magar nirmal hum ab dariya ko bhi qatra samajhte hain