ye sair kya hai ajab anokha ki ram mujh mein main ram mein hun

ye sair kyā hai 'ajab anokhā ki raam mujh meñ maiñ raam meñ huuñ

baġhair sūrat 'ajab hai jalva ki raam mujh meñ maiñ raam meñ huuñ

muraqqa.a husn-o-’ishq huuñ maiñ mujhī meñ rāz-o-niyāz sab haiñ

hoñ apnī sūrat ye aap shaidā ki raam mujh meñ maiñ raam meñ huuñ

zamāna ā.īna-e-rām kā hai har ek sūrat se hai vo paidā

jo chashm-e-haq-bīñ khulī to dekhā ki raam mujh meñ maiñ raam meñ huuñ

vo mujh se har rañg meñ milā hai ki gul se bū bhī kabhī judā hai

habāb-o-dariyā kā hai tamāsha ki raam mujh meñ maiñ raam meñ huuñ

sabab batā.ūñ maiñ vajd kā kyā hai kyā jo dar-parda dekhtā huuñ

sadā ye har saaz se hai paidā ki raam mujh meñ maiñ raam meñ huuñ

basā hai mere dil meñ vo dilbar hai ā.īna meñ ḳhud ā.īna gar

'ajab tahayyur huā ye kaisā ki raam mujh meñ maiñ raam meñ huuñ

maqām pūchho to lā-makāñ thā na raam meñ thā na maiñ vahāñ thā

liyā jo karvaT to hosh aayā ki raam mujh meñ maiñ raam meñ huuñ

'alattavātur hai paak jalva ki dil banā barq-e-sīna

taḌap ke dil yuuñ pukār uThā ki raam mujh meñ maiñ raam meñ huuñ

jahāz dariyā meñ aur dariyā jahāz meñ bhī to dekhiye aaj

ye jism kashtī hai raam dariyā hai ki raam mujh meñ maiñ raam meñ huuñ

ye sair kya hai 'ajab anokha ki ram mujh mein main ram mein hun

baghair surat 'ajab hai jalwa ki ram mujh mein main ram mein hun

muraqqa husn-o-’ishq hun main mujhi mein raaz-o-niyaz sab hain

hon apni surat ye aap shaida ki ram mujh mein main ram mein hun

zamana aaina-e-ram ka hai har ek surat se hai wo paida

jo chashm-e-haq-bin khuli to dekha ki ram mujh mein main ram mein hun

wo mujh se har rang mein mila hai ki gul se bu bhi kabhi juda hai

habab-o-dariya ka hai tamasha ki ram mujh mein main ram mein hun

sabab bataun main wajd ka kya hai kya jo dar-parda dekhta hun

sada ye har saz se hai paida ki ram mujh mein main ram mein hun

basa hai mere dil mein wo dilbar hai aaina mein KHud aaina gar

'ajab tahayyur hua ye kaisa ki ram mujh mein main ram mein hun

maqam puchho to la-makan tha na ram mein tha na main wahan tha

liya jo karwaT to hosh aaya ki ram mujh mein main ram mein hun

'alattawatur hai pak jalwa ki dil bana barq-e-sina

taDap ke dil yun pukar uTha ki ram mujh mein main ram mein hun

jahaz dariya mein aur dariya jahaz mein bhi to dekhiye aaj

ye jism kashti hai ram dariya hai ki ram mujh mein main ram mein hun