KHayal aaya jo us mah-ru ko gul-gasht-e-kHiyaban ka

ḳhayāl aayā jo us mah-rū ko gul-gasht-e-kHiyābāñ kā

nazar kuchh aur hī aane lagā 'ālam-e-gulistāñ kā

fanā aur mahv ho gar ārzū-e-qurb hai tujh ko

kamāl-e-'ilm sarf-o-nahv se kyā faḳhr-e-insāñ kā

tirī sūrat ko dekh ai ma.adan kHūbī-e-tahayyur se

sar-e-bāzār patthar ban gayā lā'l-e-badaḳhshāñ kā

nikal saktā nahīñ pechīda-dām husn-o-mahbūbī

baḌā hī pech-kāmil hai ’azīz-o-zulf-e-kāmil kā

hisār-e-’āfiyat se mat qadam bāhar nikāl apnā

ki tifl-e-ashk-e-abtar chhoḌ kar ho saaya mizhgāñ kā

’azāb-e-gor kī nisbat se phir bhī aish-o-’ishrat hai

agarche dahr meñ mohtāj hai tū ik lab-e-nāñ kā

rifāqat apnī kyūñ-kar zāhid ḳhud kaam se hove

maiñ kū-e-yār kā tālib huuñ vo mushtāq-e-rizvāñ kā

shabīh-e-'āshiq-e-muztar ko dekh ai koh-e-rā'nā.ī

agar manzūr hai tujh ko tamāshā sañg-e-larzāñ kā

buzurgoñ kā ḳhafā honā bhī shafqat se nahīñ ḳhālī

ki garmī-e-ruḳh gardūñ-nishāñ hai abr-o-bārāñ kā

bilā paik-e-ilāhī hai na ho chīñ-bar-jabīñ us se

kare kab shukr pesh-e-haq dil-e-ranjīda mehmāñ kā

vasīla ambiyā aur auliyā kā bhī 'ajab shai hai

na dekhā dostān-e-nūh ne kuchh ḳhauf tūfāñ kā

vo be-dānish haiñ jo kHurshīd-e-'ālam-tāb kahte haiñ

ye sho.ala hai kisī 'āshiq kī aah ātish-afshāñ kā

dil-e-dīvāna apne paañv phailā.e to kyā 'sayyad'

bahut hī muḳhtasar hai dosto dāman bayābāñ kā

KHayal aaya jo us mah-ru ko gul-gasht-e-kHiyaban ka

nazar kuchh aur hi aane laga 'alam-e-gulistan ka

fana aur mahw ho gar aarzu-e-qurb hai tujh ko

kamal-e-'ilm sarf-o-nahw se kya faKHr-e-insan ka

teri surat ko dekh ai madan kHubi-e-tahayyur se

sar-e-bazar patthar ban gaya la'l-e-badaKHshan ka

nikal sakta nahin pechida-dam husn-o-mahbubi

baDa hi pech-kaamil hai ’aziz-o-zulf-e-kaamil ka

hisar-e-’afiyat se mat qadam bahar nikal apna

ki tifl-e-ashk-e-abtar chhoD kar ho saya mizhgan ka

’azab-e-gor ki nisbat se phir bhi aish-o-’ishrat hai

agarche dahr mein mohtaj hai tu ek lab-e-nan ka

rifaqat apni kyun-kar zahid KHud kaam se howe

main ku-e-yar ka talib hun wo mushtaq-e-rizwan ka

shabih-e-'ashiq-e-muztar ko dekh ai koh-e-ra'nai

agar manzur hai tujh ko tamasha sang-e-larzan ka

buzurgon ka KHafa hona bhi shafqat se nahin KHali

ki garmi-e-ruKH gardun-nishan hai abr-o-baran ka

bila paik-e-ilahi hai na ho chin-bar-jabin us se

kare kab shukr pesh-e-haq dil-e-ranjida mehman ka

wasila ambiya aur auliya ka bhi 'ajab shai hai

na dekha dostan-e-nuh ne kuchh KHauf tufan ka

wo be-danish hain jo kHurshid-e-'alam-tab kahte hain

ye shoala hai kisi 'ashiq ki aah aatish-afshan ka

dil-e-diwana apne panw phailae to kya 'sayyad'

bahut hi muKHtasar hai dosto daman bayaban ka