پا کر تجھے اپنے کو میں کیا بھول گیا ہوں

پا کر تجھے اپنے کو میں کیا بھول گیا ہوں

ہر سو دو زبانِ دوسرا بھول گیا ہوں

آتا ہے خدا بھی ترے صدقہ میں مجھے یاد

گویا کہ بظاہر میں خدا بھول گیا ہوں

عالم کے تماشے نہیں اب جاذب دل ہیں

ہر لذتِ ہستی کا مزا بھول گیا ہوں

اب مسئلہ کثرت و وحدت کو میں سمجھا

پا کر تجھے سب تیرے سوا بھول گیا ہوں

سجدہ طرفِ کعبہ ہے، دل تیری طرف ہے

اب قبلہ بھی اے قبلہ نما بھول گیا ہوں

حل جب سے ہوا فلسفۂ حسنِ حقیقت

ہر مسئلہ اے ذہن رسا بھول گیا ہوں

ہے آو سحرگاہ میں دو ذوق لب و گوش

چنگ و نئے و بر بط کی صدا بھول گیا ہوں

منظور تری چشم رضا جب سے ہوئی ہے

امید جزا خوف سزا بھول گیا ہوں

اے رہبر توفیق مجھے راہ بتا دے

نقشِ قدمِ راہ نما بھول گیا ہوں

اے خضر مرا قافلہ کس سمت گیا ہے

تمیز صداہاے درا بھول گیا ہوں

الٹا ہے ورق آج سے افسانۂ نو کا

افسانۂ پارینہ دلا بھول گیا ہوں