is baat pe kyun naraaz bhala sarkar hamare hote hain

is baat pe kyuuñ nārāz bhalā sarkār hamāre hote haiñ

hotā hai jahāñ par chāñd vahāñ do chaar sitāre hote haiñ

karatā huuñ tilāvat maiñ un kī ye 'ishq ke farz meñ dāḳhil hai

suntā huuñ hasīnoñ ke chehre to chāñd se pyāre hote haiñ

ḳhud paas to vo aate hī nahīñ taskīn magar dete haiñ yuuñ

rūmāl hilā.e jaate haiñ chilman se ishāre hote haiñ

ham-rañg agar piite haiñ to kyā is kaalī ghaTā ke mausam meñ

vaa.iz bhī to apnī tauba ko shīshe meñ utāre hote haiñ

māñgo na kisī insāñ se kabhī insāñ to hai ḳhud muhtāj-e-ḳhudā

bantī hai inhīñ kī bigḌī jo allāh ke sahāre hote haiñ

mallāh ke bal par kashtī ko mat chhoḌ vo dhokā de degā

jo quvvat-e-bāzū rakhte haiñ vo log kināre hote haiñ

phailāte nahīñ dāmān-e-talab kañgī pareshāniyāñ meñ huuñ

‘tābish’-e-kHuddār insānoñ ke aise bhī guzāre hote haiñ

is baat pe kyun naraaz bhala sarkar hamare hote hain

hota hai jahan par chand wahan do chaar sitare hote hain

karata hun tilawat main un ki ye 'ishq ke farz mein daKHil hai

sunta hun hasinon ke chehre to chand se pyare hote hain

KHud pas to wo aate hi nahin taskin magar dete hain yun

rumal hilae jate hain chilman se ishaare hote hain

ham-rang agar pite hain to kya is kali ghaTa ke mausam mein

waiz bhi to apni tauba ko shishe mein utare hote hain

mango na kisi insan se kabhi insan to hai KHud muhtaj-e-KHuda

banti hai inhin ki bigDi jo allah ke sahaare hote hain

mallah ke bal par kashti ko mat chhoD wo dhoka de dega

jo quwwat-e-bazu rakhte hain wo log kinare hote hain

phailate nahin daman-e-talab kangi pareshaniyan mein hun

‘tabish’-e-kHuddar insanon ke aise bhi guzare hote hain