firaq-e-jaanan mein humne saqi lahu piya hai sharab kar ke

firāq-e-jānāñ meñ ham ne saaqī lahū piyā hai sharāb kar ke

tap-e-alam ne jigar jo bhūnā to ham ne khāyā kabāb kar ke

mire janāze pe merā qātil namāz paḌh kar ye kah rahā hai

le ab to sar se 'azāb utrā chalā huuñ kār-e-savāb kar ke

ye kyā buḌhāpe meñ josh uTThā tamām duniyā hañsnegī vā'iz

kaheñge sab daur kaalā muñh ho to kyā karegā ḳhizāb kar ke

na phuul bulbul ḳhushī se hargiz jo gul ki phūlā nahīñ samāyā

gayā vo 'attār kī dukāñ par phir us ne khīñchā gulāb kar ke

idhar to muñh se savāl niklā udhar sitamgar ne baat kaaTī

zalīl honā paḌā hai kaisā sanam ko hāzir javāb kar ke

hue sab 'āshiqī meñ rusvā mujhī pe kyā munhasir hai sāheb

to yuuñ bhī dar-dar nahīñ phirāte kisī ko ḳhāna-ḳharāb kar ke

faqīr miskīn gadā bhikārī kahāñ the aise nasīb mere

rahe muqaddar pukārte haiñ vo mujh ko 'aalī janāb kar ke

vafā.eñ 'tāhir' kī haiñ ziyāda jafā.eñ haiñ yā tumhārī afzūñ

butoñ tum hī par ye faisla hai tum hī batā do hisāb kar ke

firaq-e-jaanan mein hum ne saqi lahu piya hai sharab kar ke

tap-e-alam ne jigar jo bhuna to hum ne khaya kabab kar ke

mere janaze pe mera qatil namaz paDh kar ye kah raha hai

le ab to sar se 'azab utra chala hun kar-e-sawab kar ke

ye kya buDhape mein josh uTTha tamam duniya hansnegi wa'iz

kahenge sab daur kala munh ho to kya karega KHizab kar ke

na phul bulbul KHushi se hargiz jo gul ki phula nahin samaya

gaya wo 'attar ki dukan par phir us ne khincha gulab kar ke

idhar to munh se sawal nikla udhar sitamgar ne baat kaTi

zalil hona paDa hai kaisa sanam ko hazir jawab kar ke

hue sab 'ashiqi mein ruswa mujhi pe kya munhasir hai saheb

to yun bhi dar-dar nahin phiraate kisi ko KHana-KHarab kar ke

faqir miskin gada bhikari kahan the aise nasib mere

rahe muqaddar pukarte hain wo mujh ko 'ali janab kar ke

wafaen 'tahir' ki hain ziyaada jafaen hain ya tumhaari afzun

buton tum hi par ye faisla hai tum hi bata do hisab kar ke