tark-e-gham gawara hai aur na gham ka yara hai

tark-e-ġham gavārā hai aur na ġham kā yaarā hai

ab to dil kī har dhaḌkan ālam-e-āshkārā hai

ham se be-sahāroñ ko aap kā sahārā hai

aap hī kī dukh sukh meñ umr bhar pukārā hai

mauj ḳhud safīna hai bahr ḳhud kinārā hai

nāḳhudā se kyā matlab jab ḳhudā hamārā hai

ho chalā yaqīn jab se vo hasīñ hamārā hai

ye ḳhush-e'timādī bhī ik baḌā sahārā hai

ye to kahiye kyā us ko aap chhoḌ sakte haiñ

jis ne marte marte bhī aap ko pukārā hai

lutf-e-bandagī tum se merī zindagī tum se

tum nahīñ to phir kis ko zindagī gavārā hai

kis ḳhatā pe jhoñkī hai ḳhaak merī āñkhoñ meñ

kyā maqām thā merā aur kahāñ utārā hai

hāsil-e-murād-e-dil chashm-e-iltifāf us kī

saarī kā.enāt apnī vo agar hamārā hai

phir isī pe marne ko jī uThūñgā mahshar meñ

phir vahī jilāe.gā jis ne mujh ko maarā hai

bach ke sab kī nazroñ se ham ne āñkhoñ āñkhoñ meñ

apne yaar kā sadqa bārhā utārā hai

ye to saaf zāhir hai ham usī ke bande haiñ

koī us se jā pūchhe vo bhī kiyā hamārā hai

jo na dekh saktā ho chaak dāmanī merī

chaak parda-e-isyāñ kab use gavārā hai

ham se pūchhiye sāhib intizār kī ghaḌiyāñ

ham ne raat kaaTī hai ham ne din guzārā hai

ik taraf tamannā.eñ ik taraf ḳhushī un kī

haaye kis dorāhe par kashmakash ne maarā hai

be-hunarī sahī lekin be-vafā nahīñ 'kāmil'

ye tumhārā banda hai aur faqat tumhārā hai

tark-e-gham gawara hai aur na gham ka yara hai

ab to dil ki har dhaDkan aalam-e-ashkara hai

hum se be-sahaaron ko aap ka sahaara hai

aap hi ki dukh sukh mein umr bhar pukara hai

mauj KHud safina hai bahr KHud kinara hai

naKHuda se kya matlab jab KHuda hamara hai

ho chala yaqin jab se wo hasin hamara hai

ye KHush-e'timadi bhi ek baDa sahaara hai

ye to kahiye kya us ko aap chhoD sakte hain

jis ne marte marte bhi aap ko pukara hai

lutf-e-bandagi tum se meri zindagi tum se

tum nahin to phir kis ko zindagi gawara hai

kis KHata pe jhonki hai KHak meri aankhon mein

kya maqam tha merā aur kahan utara hai

hasil-e-murad-e-dil chashm-e-iltifaf us ki

sari kaenat apni wo agar hamara hai

phir isi pe marne ko ji uThunga mahshar mein

phir wahi jilaega jis ne mujh ko mara hai

bach ke sab ki nazron se hum ne aankhon aankhon mein

apne yar ka sadqa barha utara hai

ye to saf zahir hai hum usi ke bande hain

koi us se ja puchhe wo bhi kiya hamara hai

jo na dekh sakta ho chaak damani meri

chaak parda-e-isyan kab use gawara hai

hum se pūchhiye sahib intizar ki ghaDiyan

hum ne raat kaTi hai hum ne din guzara hai

ek taraf tamannaen ek taraf KHushi un ki

haye kis dorahe par kashmakash ne mara hai

be-hunari sahi lekin be-wafa nahin 'kaamil'

ye tumhaara banda hai aur faqat tumhaara hai