main hi nur-e-nubuwat-e-ambiya hun

maiñ hī nūr-e-nubuvāt-e-ambiyā huuñ

maiñ hī zor-e-vilāyat-e-auliyā huuñ

parastish hai mirī dair-o-haram meñ

maiñ shaiḳh-o-barhaman kā mudda'ā huuñ

zuhūr-e-hastī-e-mutlaq meñ apnī

maiñ hī ḳhud-bīñ huuñ maiñ ḳhud-numā huuñ

koī kahtā hai zāhir koī bātin

ye zan mahz hai maiñ lā-patā huuñ

kaTā mansūr kā sar jis ke pīchhe

vahī to maiñ anal-haq kī sadā huuñ

tumheñ hāsil nahīñ chashm-e-haqīqat

vagarna maiñ hī ganj-e-makHfiyā huuñ

hayā huuñ maiñ hasīnān-e-jahāñ kī

marīz-e-'ishq kī maiñ hī davā huuñ

main hi nur-e-nubuwat-e-ambiya hun

main hi zor-e-wilayat-e-auliya hun

parastish hai meri dair-o-haram mein

main shaiKH-o-barhaman ka mudda'a hun

zuhur-e-hasti-e-mutlaq mein apni

main hi KHud-bin hun main KHud-numa hun

koi kahta hai zahir koi baatin

ye zan mahz hai main la-pata hun

kaTa mansur ka sar jis ke pichhe

wahi to main anal-haq ki sada hun

tumhein hasil nahin chashm-e-haqiqat

wagarna main hi ganj-e-makHfiya hun

haya hun main hasinan-e-jahan ki

mariz-e-'ishq ki main hi dawa hun