hai nahin jis mein haqiqat wo shariat kaisi

hai nahīñ jis meñ haqīqat vo sharī'at kaisī

jis meñ iḳhlās na ho vo hai tarīqat kaisī

manzil-e-'ishq meñ taklīf hai rāhat kaisī

tāj-e-zillat hai yahāñ ḳhil'at-e-'izzat kaisī

sar-nigūñ qaisar-o-jam kyuuñ na hoñ mere aage

mil ga.ī haq se mujhe faqr kī daulat kaisī

lā-ilāha-illā anā aap haiñ kahte kis ko

hai agar ġhair to phir aap kī vahdat kaisī

dekh le shān-e-ḳhudā gar hai basīrat tujh ko

sūrat-e-pīr meñ zāhir hai haqīqat kaisī

'arsh se farsh talak maiñ ne tujhī ko dekhā

kī 'atā tū ne mujhe chashm-e-basīrat kaisī

man ra.ānī ne kiyā mujh ko ġharīq-e-hairat

jis kī sūrat nahīñ phir us kī shabāhat kaisī

dil se vājib hai adā karnā farā.ez kā 'asad'

jab nahīñ dil hī to phir tujh se 'ibādat kaisī

hai nahin jis mein haqiqat wo shari'at kaisi

jis mein iKHlas na ho wo hai tariqat kaisi

manzil-e-'ishq mein taklif hai rahat kaisi

taj-e-zillat hai yahan KHil'at-e-'izzat kaisi

sar-nigun qaisar-o-jam kyun na hon mere aage

mil gai haq se mujhe faqr ki daulat kaisi

la-ilaha-illa ana aap hain kahte kis ko

hai agar ghair to phir aap ki wahdat kaisi

dekh le shan-e-KHuda gar hai basirat tujh ko

surat-e-pir mein zahir hai haqiqat kaisi

'arsh se farsh talak main ne tujhi ko dekha

ki 'ata tu ne mujhe chashm-e-basirat kaisi

man raani ne kiya mujh ko ghariq-e-hairat

jis ki surat nahin phir us ki shabahat kaisi

dil se wajib hai ada karna faraez ka 'asad'

jab nahin dil hi to phir tujh se 'ibaadat kaisi