ہے نہیں جس میں حقیقت وہ شریعت کیسی

ہے نہیں جس میں حقیقت وہ شریعت کیسی

جس میں اخلاص نہ ہو وہ ہے طریقت کیسی

منزل-عشق میں تکلیف ہے راحت کیسی

تاج ذلت ہے یہاں خلعت عزت کیسی

سرنگوں قیصر و جم کیوں نہ ہوں میرے آگے

مل گئی حق سے مجھے فقر کی دولت کیسی

لا الہ الا انا آپ ہیں کہتے کس کو

ہے اگر غیر تو پھر آپ کی وحدت کیسی

دیکھ لے شان خدا گر ہے بصیرت تجھ کو

صورت پیر میں ظاہر ہے حقیقت کیسی

عرش سے فرش تلک میں نے تجھی کو دیکھا

کی عطا تو نے مجھے چشم بصیرت کیسی

من رآنی نے کیا مجھ کو غریق حیرت

جس کی صورت نہیں پھر اس کی شباہت کیسی

دل سے واجب ہے ادا کرنا فرائض کا اسدؔ

جب نہیں دل ہی تو پھر تجھ سے عبادت کیسی