KHud ada marti hai jis par wo ada kuchh aur hai

ḳhud adā martī hai jis par vo adā kuchh aur hai

hai vafā bhī jis pe sadqe vo jafā kuchh aur hai

qum iznī yā sub.hānī yā hqqam yā lais fī

in sadāoñ se judā apnī sadā kuchh aur hai

us ke rindoñ ke yahāñ sab se nirāle taur haiñ

un kā to som-o-salāt-o-ittiqā kuchh aur hai

kyā kahūñ pīr-e-muġhāñ kā dosto lutf-o-karam

apne mastoñ ke liye us kī 'atā kuchh aur hai

kab sharāb-e-nāb kī ho qadr us ke sāmne

ham balā-noshoñ kī talchhaT kā maza kuchh aur hai

maiñ nafī isbāt se kuchh bhī nahīñ rakhtā ġharaz

jis meñ mashġhūl huuñ vo mashġhala kuchh aur hai

nahnu-o-'aqrab kah ke vo sab ko bulā.e haiñ 'asad'

phir jo haiñ un meñ fanā un ko nidā kuchh aur hai

KHud ada marti hai jis par wo ada kuchh aur hai

hai wafa bhi jis pe sadqe wo jafa kuchh aur hai

qum izni ya subhani ya hqqam ya lais fi

in sadaon se juda apni sada kuchh aur hai

us ke rindon ke yahan sab se nirale taur hain

un ka to som-o-salat-o-ittiqa kuchh aur hai

kya kahun pir-e-mughan ka dosto lutf-o-karam

apne maston ke liye us ki 'ata kuchh aur hai

kab sharab-e-nab ki ho qadr us ke samne

hum bala-noshon ki talchhaT ka maza kuchh aur hai

main nafi isbaat se kuchh bhi nahin rakhta gharaz

jis mein mashghul hun wo mashghala kuchh aur hai

nahnu-o-'aqrab kah ke wo sab ko bulae hain 'asad'

phir jo hain un mein fana un ko nida kuchh aur hai