خود ادا مرتی ہے جس پر وہ ادا کچھ اور ہے

خود ادا مرتی ہے جس پر وہ ادا کچھ اور ہے

ہے وفا بھی جس پہ صدقے وہ جفا کچھ اور ہے

قم اذنی یا سبحانی یا حقم یا لیس فی

ان صداؤں سے جدا اپنی صدا کچھ اور ہے

اس کے رندوں کے یہاں سب سے نرالے طور ہیں

ان کا تو صوم و صلوٰۃ و اتقا کچھ اور ہے

کیا کہوں پیر مغاں کا دوستو لطف و کرم

اپنے مستوں کے لیے اس کی عطا کچھ اور ہے

کب شراب ناب کی ہو قدر اس کے سامنے

ہم بلا نوشوں کی تلچھٹ کا مزہ کچھ اور ہے

میں نفی اثبات سے کچھ بھی نہیں رکھتا غرض

جس میں مشغول ہوں وہ مشغلہ کچھ اور ہے

نحن و اقرب کہہ کے وہ سب کو بلائے ہیں اسدؔ

پھر جو ہیں ان میں فنا ان کو ندا کچھ اور ہے