rahm hai jis ke sitam mein wo sitam-gar aur hai

rahm hai jis ke sitam meñ vo sitam-gar aur hai

hai vafā jis kī jafā meñ vo jafā gar aur hai

rakh diyā kyā soch kar saaqī ne de kar jām-e-mai

mast kar de be-piye vo daur-e-sāġhar aur hai

hai nahīñ jannat meñ 'ābid jis kī ḳhvāhish hai tujhe

tā abad qaa.em rakhe vo jām-e-kausar aur hai

khīñch le us ko kināre par koī mumkin nahīñ

kashtī-e-bahr-e-fanā kā yaaro lañgar aur hai

lākhoñ dar lākhoñ hue haiñ ġharq ho ke be-nishāñ

bahr-e-vahdat se jo niklā vo shanāvar aur hai

toḌ de jo hastī-e-vahmī kā ḳhaibar aan meñ

maz.har-e-haq meñ 'asad' vo shān-e-haidar aur hai

rahm hai jis ke sitam mein wo sitam-gar aur hai

hai wafa jis ki jafa mein wo jafa gar aur hai

rakh diya kya soch kar saqi ne de kar jam-e-mai

mast kar de be-piye wo daur-e-saghar aur hai

hai nahin jannat mein 'abid jis ki KHwahish hai tujhe

ta abad qaem rakhe wo jam-e-kausar aur hai

khinch le us ko kinare par koi mumkin nahin

kashti-e-bahr-e-fana ka yaro langar aur hai

lakhon dar lakhon hue hain gharq ho ke be-nishan

bahr-e-wahdat se jo nikla wo shanawar aur hai

toD de jo hasti-e-wahmi ka KHaibar aan mein

mazhar-e-haq mein 'asad' wo shan-e-haidar aur hai