رحم ہے جس کے ستم میں وہ ستم گر اور ہے

رحم ہے جس کے ستم میں وہ ستم گر اور ہے

ہے وفا جس کی جفا میں وہ جفا گر اور ہے

رکھ دیا کیا سوچ کر ساقی نے دے کر جام مے

مست کر دے بے پیے وہ دور ساغر اور ہے

ہے نہیں جنت میں عابد جس کی خواہش ہے تجھے

تا ابد قائم رکھے وہ جام کوثر اور ہے

کھینچ لے اس کو کنارے پر کوئی ممکن نہیں

کشتی بحر فنا کا یارو لنگر اور ہے

لاکھوں در لاکھوں ہوئے ہیں غرق ہو کے بے نشاں

بحر وحدت سے جو نکلا وہ شناور اور ہے

توڑ دے جو ہستیٔ وہمی کا خیبر آن میں

مظہر حق میں اسدؔ وہ شان حیدر اور ہے