kahin soz-e-jigar mein wo kahin dard-e-nihan ho kar

kahīñ soz-e-jigar meñ vo kahīñ dard-e-nihāñ ho kar

kahīñ haiñ vo kisī dil meñ kahīñ shor-o-fuġhāñ ho kar

kahīñ ghā.il kiye tīr-e-nigāh-e-nāznīñ ban kar

kahīñ vo ḳhuun karte haiñ adā-e-jāñ-sitāñ ho kar

ḳhud hī kahte haiñ zāhir haiñ jahāñ dekho hamīñ ham haiñ

magar ye jā-e-hasrat hai chhupe phir kyuuñ ayaañ ho kar

shikasta dil meñ rahte haiñ hai sābit un ke kahne se

ta’ajjub hai pata dete haiñ apnā lā-makāñ ho kar

haram meñ jalva-afzā.ī hai shān-e-dilrubā.ī meñ

tajallī hind meñ dete haiñ vo husn-e-butāñ ho kar

hayāt-e-jāvedānī kā agar tālib hai tū sālik

basar kar zindagī apnī 'ayāñ meñ tū nihāñ ho kar

anā kā jin ko da'ava thā vo qaa.em tā-abad rahte

ga.e zer-e-zamīñ phir kis liye vo be-nishāñ ho kar

karī ātish-parastī gabr ho kar ai 'asad' barsoñ

dikhāyā sirr-e-ma,anī us ne tab pīr-e-muġhāñ ho kar

kahin soz-e-jigar mein wo kahin dard-e-nihan ho kar

kahin hain wo kisi dil mein kahin shor-o-fughan ho kar

kahin ghail kiye tir-e-nigah-e-naznin ban kar

kahin wo KHun karte hain ada-e-jaan-sitan ho kar

KHud hi kahte hain zahir hain jahan dekho hamin hum hain

magar ye ja-e-hasrat hai chhupe phir kyun ayan ho kar

shikasta dil mein rahte hain hai sabit un ke kahne se

ta’ajjub hai pata dete hain apna la-makan ho kar

haram mein jalwa-afzai hai shan-e-dilrubai mein

tajalli hind mein dete hain wo husn-e-butan ho kar

hayat-e-jawedani ka agar talib hai tu salik

basar kar zindagi apni 'ayan mein tu nihan ho kar

ana ka jin ko da'awa tha wo qaem ta-abad rahte

gae zer-e-zamin phir kis liye wo be-nishan ho kar

kari aatish-parasti gabr ho kar ai 'asad' barson

dikhaya sirr-e-ma,ani us ne tab pir-e-mughan ho kar