kya kahen millat-o-din kufr hai iman apna

kyā kaheñ millat-o-dīñ kufr hai īmāñ apnā

pesh-e-but-e-sajda hai aur dair hai aivāñ apnā

jhukte turbat pe nahīñ jhukte kisī aur se haiñ

mā-sivā us kā kahāñ raaz hai pinhāñ apnā

dekh to chashm-e-basīrat se unheñ ai munkir

un butoñ meñ hī to hai rañg numāyāñ apnā

jhuk ga.e jis se malak shaan hai kis kī aisī

martaba bhuul gayā haif ye insāñ apnā

hosh meñ aa na lagā dair-o-haram ke chakkar

bhuul kar aap ko kyuuñ aap hai jūyāñ apnā

sho'bada-bāzī pe apnī na ho ḳhush pīr-e-falak

ham samajhte haiñ use ḳhvāb-e-pareshāñ apnā

barahman Daal de zunnār gale meñ mere

ho gayā 'abd sanam kho diyā īmāñ apnā

dhajjiyāñ kis kī uḌā.egā batā dast-e-junoñ

chaak ham kar chuke pahle hī garebāñ apnā

kya kahen millat-o-din kufr hai iman apna

pesh-e-but-e-sajda hai aur dair hai aiwan apna

jhukte turbat pe nahin jhukte kisi aur se hain

ma-siwa us ka kahan raaz hai pinhan apna

dekh to chashm-e-basirat se unhen ai munkir

un buton mein hi to hai rang numayan apna

jhuk gae jis se malak shan hai kis ki aisi

martaba bhul gaya haif ye insan apna

hosh mein aa na laga dair-o-haram ke chakkar

bhul kar aap ko kyun aap hai juyan apna

sho'bada-bazi pe apni na ho KHush pir-e-falak

hum samajhte hain use KHwab-e-pareshan apna

barahman Dal de zunnar gale mein mere

ho gaya 'abd sanam kho diya iman apna

dhajjiyan kis ki uDaega bata dast-e-junon

chaak hum kar chuke pahle hi gareban apna