taswir-e-sanam jis dil mein hai us dil ka samajhna mushkil hai

tasvīr-e-sanam jis dil meñ hai us dil kā samajhnā mushkil hai

tahrīm-e-haram to āsāñ hai tahrīm-e-kalīsā mushkil hai

yuuñ laakh jhaTkāyā sar to kyā yuuñ laakh ka.e sajde to kyā

jo sajda ḳhudā kā manshā hai ai shaiḳh vo sajda mushkil hai

nākāmī-e-ulfat kā qissa ro ro ke yañh karnā hai junūñ

vo kaam hī kyuuñ insān kare jis kaam kā banñā mushkil hai

irfān-e-junūñ to hāsil hai irfān-e-nazar se haiñ aajiz

kis tarah kisī ko ham samjheñ ḳhud apnā samajhnā mushkil hai

thā husn-e-azal parde meñ nihāñ hai husn-e-azal parde meñ nihāñ

is vaqt bhī jalva mushkil thā us vaqt bhī jalva mushkil hai

jab tak na ho saudā ulfat kā jab tak na ho sar meñ josh-e-junūñ

nazroñ se mohabbat meñ hamdam paimāish-e-sehra mushkil hai

taswir-e-sanam jis dil mein hai us dil ka samajhna mushkil hai

tahrim-e-haram to aasan hai tahrim-e-kalisa mushkil hai

yun lakh jhaTkaya sar to kya yun lakh kae sajde to kya

jo sajda KHuda ka mansha hai ai shaiKH wo sajda mushkil hai

nakaami-e-ulfat ka qissa ro ro ke yanh karna hai junun

wo kaam hi kyun insan kare jis kaam ka banna mushkil hai

irfan-e-junun to hasil hai irfan-e-nazar se hain aajiz

kis tarah kisi ko hum samjhen KHud apna samajhna mushkil hai

tha husn-e-azal parde mein nihan hai husn-e-azal parde mein nihan

is waqt bhi jalwa mushkil tha us waqt bhi jalwa mushkil hai

jab tak na ho sauda ulfat ka jab tak na ho sar mein josh-e-junun

nazron se mohabbat mein hamdam paimaish-e-sehra mushkil hai