aap is tarah to hosh uDaya na kijiye

aap is tarah to hosh uḌāyā na kījiye

yuuñ ban sañvar ke sāmne aayā na kījiye

yā sar pe aadmī ko biThāyā na kījiye

yā phir nazar se us ko girāyā na kījiye

yuuñ madh-bharī nigāh uThāyā na kījiye

piinā harām hai to pilāyā na kījiye

kahiye to aap mahv haiñ kis ke ḳhayāl meñ

ham se to dil kī baat chhupāyā na kījiye

teġh-e-sitam se kaam jo lenā thā le chuke

ahl-e-vafā kā yuuñ to safāyā na kījiye

ham aap ke ghar aap kā aa.eñ hazār baar

lekin kisī kī baat meñ aayā na kījiye

uTh jā.eñge ham aap kī mahfil se aap hī

dushman ke rū-ba-rū to biThāyā na kījiye

dil duur hoñ to haath milāne se fā.eda

rasman kisī se haath milāyā na kījiye

mahrūm hoñ latāfat-e-fitrat se jo 'nasīr'

un be-hisoñ ko sher sunāyā na kījiye

aap is tarah to hosh uDaya na kijiye

yun ban sanwar ke samne aaya na kijiye

ya sar pe aadmi ko biThaya na kijiye

ya phir nazar se us ko giraya na kijiye

yun madh-bhari nigah uThaya na kijiye

pina haram hai to pilaya na kijiye

kahiye to aap mahw hain kis ke KHayal mein

hum se to dil ki baat chhupaya na kijiye

tegh-e-sitam se kaam jo lena tha le chuke

ahl-e-wafa ka yun to safaya na kijiye

hum aap ke ghar aap ka aaen hazar bar

lekin kisi ki baat mein aaya na kijiye

uTh jaenge hum aap ki mahfil se aap hi

dushman ke ru-ba-ru to biThaya na kijiye

dil dur hon to hath milane se faeda

rasman kisi se hath milaya na kijiye

mahrum hon latafat-e-fitrat se jo 'nasir'

un be-hison ko sher sunaya na kijiye