har chehre mein aati hai nazar yar ki surat

har chehre meñ aatī hai nazar yaar kī sūrat

ahbāb kī sūrat ho ki aġhyār kī sūrat

siine meñ agar soz salāmat ho to ḳhud hī

ash.ār meñ Dhal jaatī hai afkār kī sūrat

jis aañkh ne dekhā hai us aañkh ko dekhūñ

hai us ke sivā kyā tire dīdār kī sūrat

pahchān liyā tujh ko tirī shīshagarī se

aatī hai nazar fan se hī fankār kī sūrat

ashkoñ ne bayāñ kar hī diyā rāz-e-tamannā

ham soch rahe the abhī iz.hār kī sūrat

is ḳhaak meñ poshīda haiñ har rañg ke ḳhāke

miTTī se nikalte haiñ jo gulzār kī sūrat

dil haath par rakhā hai koī hai jo ḳharīde

dekhūñ to zarā maiñ bhī ḳharīdār kī sūrat

sūrat merī āñkhoñ meñ samā.egī na koī

nazroñ meñ basī rahtī hai sarkār kī sūrat

'vāsif' ko sardār pukārā hai kisī ne

inkār kī sūrat hai na iqrār kī sūrat

har chehre mein aati hai nazar yar ki surat

ahbab ki surat ho ki aghyar ki surat

sine mein agar soz salamat ho to KHud hi

ashaar mein Dhal jati hai afkar ki surat

jis aankh ne dekha hai us aankh ko dekhun

hai us ke siwa kya tere didar ki surat

pahchan liya tujh ko teri shishagari se

aati hai nazar fan se hi fankar ki surat

ashkon ne bayan kar hi diya raaz-e-tamanna

hum soch rahe the abhi izhaar ki surat

is KHak mein poshida hain har rang ke KHake

miTTi se nikalte hain jo gulzar ki surat

dil hath par rakha hai koi hai jo KHaride

dekhun to zara main bhi KHaridar ki surat

surat meri aankhon mein samaegi na koi

nazron mein basi rahti hai sarkar ki surat

'wasif' ko sardar pukara hai kisi ne

inkar ki surat hai na iqrar ki surat