tum ek gorakh dhanda ho

kabhī yahāñ tumheñ DhūñDā kabhī vahāñ pahuñchā

tumhārī diid kī ḳhātir kahāñ-kahāñ pahuñchā

ġharīb miT ga.e pāmāl ho ga.e lekin

kisī talak na terā aaj tak nishāñ pahuñchā

ho bhī nahīñ aur har jā ho

tum ik gorakh dhanda ho

har zarre meñ kis shaan se tū jalva-numā hai

hairāñ hai magar 'aql meñ kaisā hai tū kyā hai

tujhe dair-o-haram meñ maiñ ne DhūñDhā tū nahīñ miltā

magar tashrīf farmā tujh ko apne dil meñ dekhā hai

jab ba-juz tere koī dūsrā maujūd nahīñ

phir samajh meñ nahīñ aatā terā parda karnā

tum ik gorakh dhanda ho

koī saf meñ tumhārī kho gayā hai

isī kho.e hue ko kuchh milā hai

na but-ḳhāne na kā'be meñ milā hai

magar TuuTe hue dil meñ milā hai

'adam ban kar kahīñ to chhup gayā hai

kahīñ tū hast ban kar aa gayā hai

nahīñ hai tū to phir inkār kaisā

nafī bhī tere hone kā pata hai

maiñ jis ko kah rahā huuñ apnī hastī

agar vo tū nahīñ to aur kyā hai

nahīñ aayā ḳhayāloñ meñ agar tū

to phir maiñ kaise samjhā tū ḳhudā hai

tum ik gorakh dhanda ho

hairān huuñ

maiñ hairān huuñ is baat pe tum kaun ho kyā ho

haath aao to but haath na aao to ḳhudā ho

asl meñ jo mil gayā lā-ilāha kyuuñ kar huā

jo samajh meñ aa gayā phir vo ḳhudā kyuuñ kar huā

falsafī ko bahs ke andar ḳhudā miltā nahīñ

Dor ko suljhā rahā hai aur sirā miltā nahīñ

chhupte nahīñ ho sāmne aate nahīñ ho tum

jalva dikhā ke jalva dikhāte nahīñ ho tum

dair-o-haram ke jhagḌe miTāte nahīñ ho tum

jo asl baat hai vo batāte nahīñ ho tum

hairāñ huuñ mere dil meñ samā.e ho kis tarah

hālāñki do-jahāñ meñ samāte nahīñ ho tum

ye mā'bad-o-haram ye kalīsā-o-dair kyuuñ

harjā.ī ho jabhī to batāte nahīñ ho tum

bas tum ik gorakh dhanda ho

nit-na.e naqsh banāte ho miTā dete ho

jaane kis jurm-e-tamannā kī sazā dete ho

kabhī kañkar ko banā dete ho hiire kī kanī

kabhī hīroñ ko bhī miTTī meñ milā dete ho

zindagī kitne hī murdoñ ko 'atā kī jis ne

vo masīhā bhī salīboñ pe sajā dete ho

ḳhvāhish-e-dīd jo kar baiThe sar-e-tūr koī

tuur hī baḌh ke tajallī se jalā dete ho

nār-e-namrūd meñ Dalvāte ho ḳhud apnā ḳhalīl

ḳhud hī phir naar ko gulzār banā dete ho

chāh-e-kan'ān meñ pheñko kabhī māh-e-kan’āñ

nuur yāqūb kī āñkhoñ kā bujhā dete ho

becho yūsuf ko kabhī misr ke bāzāroñ meñ

āḳhir-e-kār shah-e-misr banā dete ho

jazb-o-mastī kī jo manzil pe pahuñchtā hai koī

baiTh kar dil meñ anal-haq kī sadā dete ho

ḳhud hī lagvāte ho phir kufr ke fatve us par

ḳhud hī mansūr ko suulī pe chaḌhā dete ho

apnī hastī bhī vo ik roz gañvā baiThtā hai

apne darshan kī lagan jis ko lagā dete ho

koī rāñjhā jo kabhī khoj meñ nikle terī

tum use jhang ke bele meñ uḌā dete ho

justujū le ke tumhārī jo chale qais koī

is ko majnūñ kisī lailā kā banā dete ho

jot sasi ke agar man meñ tumhārī jaage

tum use tapte hue thal meñ jalā dete ho

sohnī gar tum ko mahivāl tasavvur kar le

is ko biphrī huī lahroñ meñ bahā dete ho

ḳhud jo chāho to sar-e-'arsh bulā kar mahbūb

ek hī raat meñ me'arāj karā dete ho

tum ik gorakh dhanda ho

kabhi yahan tumhein DhunDa kabhi wahan pahuncha

tumhaari did ki KHatir kahan-kahan pahuncha

gharib miT gae pamal ho gae lekin

kisi talak na tera aaj tak nishan pahuncha

ho bhi nahin aur har ja ho

tum ek gorakh dhanda ho

har zarre mein kis shan se tu jalwa-numa hai

hairan hai magar 'aql mein kaisa hai tu kya hai

tujhe dair-o-haram mein main ne DhunDha tu nahin milta

magar tashrif farma tujh ko apne dil mein dekha hai

jab ba-juz tere koi dusra maujud nahin

phir samajh mein nahin aata tera parda karna

tum ek gorakh dhanda ho

koi saf mein tumhaari kho gaya hai

isi khoe hue ko kuchh mila hai

na but-KHane na ka'be mein mila hai

magar TuTe hue dil mein mila hai

'adam ban kar kahin to chhup gaya hai

kahin tu hast ban kar aa gaya hai

nahin hai tu to phir inkar kaisa

nafi bhi tere hone ka pata hai

main jis ko kah raha hun apni hasti

agar wo tu nahin to aur kya hai

nahin aaya KHayalon mein agar tu

to phir main kaise samjha tu KHuda hai

tum ek gorakh dhanda ho

hairan hun

main hairan hun is baat pe tum kaun ho kya ho

hath aao to but hath na aao to KHuda ho

asl mein jo mil gaya la-ilaha kyun kar hua

jo samajh mein aa gaya phir wo KHuda kyun kar hua

falsafi ko bahs ke andar KHuda milta nahin

Dor ko suljha raha hai aur sira milta nahin

chhupte nahin ho samne aate nahin ho tum

jalwa dikha ke jalwa dikhate nahin ho tum

dair-o-haram ke jhagDe miTate nahin ho tum

jo asl baat hai wo batate nahin ho tum

hairan hun mere dil mein samae ho kis tarah

haalanki do-jahan mein samate nahin ho tum

ye ma'bad-o-haram ye kalisa-o-dair kyun

harjai ho jabhi to batate nahin ho tum

bas tum ek gorakh dhanda ho

nit-nae naqsh banate ho miTa dete ho

jaane kis jurm-e-tamanna ki saza dete ho

kabhi kankar ko bana dete ho hire ki kani

kabhi hiron ko bhi miTTi mein mila dete ho

zindagi kitne hi murdon ko 'ata ki jis ne

wo masiha bhi salibon pe saja dete ho

KHwahish-e-did jo kar baiThe sar-e-tur koi

tur hi baDh ke tajalli se jala dete ho

nar-e-namrud mein Dalwate ho KHud apna KHalil

KHud hi phir nar ko gulzar bana dete ho

chah-e-kan'an mein phenko kabhi mah-e-kan’an

nur yaqub ki aankhon ka bujha dete ho

becho yusuf ko kabhi misr ke bazaron mein

aaKHir-e-kar shah-e-misr bana dete ho

jazb-o-masti ki jo manzil pe pahunchta hai koi

baiTh kar dil mein anal-haq ki sada dete ho

KHud hi lagwate ho phir kufr ke fatwe us par

KHud hi mansur ko suli pe chaDha dete ho

apni hasti bhi wo ek roz ganwa baiThta hai

apne darshan ki lagan jis ko laga dete ho

koi ranjha jo kabhi khoj mein nikle teri

tum use jhang ke bele mein uDa dete ho

justuju le ke tumhaari jo chale qais koi

is ko majnun kisi laila ka bana dete ho

jot sasi ke agar man mein tumhaari jage

tum use tapte hue thal mein jala dete ho

sohni gar tum ko mahiwal tasawwur kar le

is ko biphri hui lahron mein baha dete ho

KHud jo chaho to sar-e-'arsh bula kar mahbub

ek hi raat mein me'araj kara dete ho

tum ek gorakh dhanda ho