jamal-e-ibtida ban kar jalal-e-intiha hokar

jamāl-e-ibtidā ban kar jalāl-e-intihā hokar

bashar duniyā meñ aayā maz.har-e-shān-e-ḳhudā hokar

mirī darmāndagī par kyuuñ na duniyā rashk farmā.e

ki apne paañv toḌe maiñ ne manzil-āshnā hokar

mire zauq-e-fanā kā mā-hasal itnā to ho yā-rab

zamīñ kā chāñd ban jā.ūñ kisī kā naqsh-e-pā hokar

vajūd-e-jauhar-e-fitrī kahīñ miTtā hai duniyā se

rahī hai ḳhaak paare kī hamesha kīmiyā hokar

ijāzat do ki ham bhī do ghaḌī hairat-kashī kar leñ

tumhār ā.īnā-kHāna meñ tasvīr-e-vafā hokar

hayāt-afroz dil de kar mujhe jis ne navāzā thā

sitam to dekhiye aayā vahī merī qazā hokar

use apne maqām apnī jagah kā ilm kyuuñ kar ho

kahāñ vo aap meñ jo rah gayā hai aap kā hokar

farishte kyuuñ qadam apne baḌhāte jānib-e-duniyā

hameñ aanā thā ham aa.e mashiyyat kī adā hokar

ḳhudā rakhe salāmat tum ko rahnā hai abhī 'turfa'

kisī kā rāhbar ban kar kisī kā rahnumā hokar

jamal-e-ibtida ban kar jalal-e-intiha hokar

bashar duniya mein aaya mazhar-e-shan-e-KHuda hokar

meri darmandagi par kyun na duniya rashk farmae

ki apne panw toDe main ne manzil-ashna hokar

mere zauq-e-fana ka ma-hasal itna to ho ya-rab

zamin ka chand ban jaun kisi ka naqsh-e-pa hokar

wajud-e-jauhar-e-fitri kahin miTta hai duniya se

rahi hai KHak pare ki hamesha kimiya hokar

ijazat do ki hum bhi do ghaDi hairat-kashi kar len

tumhaar aaina-kHana mein taswir-e-wafa hokar

hayat-afroz dil de kar mujhe jis ne nawaza tha

sitam to dekhiye aaya wahi meri qaza hokar

use apne maqam apni jagah ka ilm kyun kar ho

kahan wo aap mein jo rah gaya hai aap ka hokar

farishte kyun qadam apne baDhate jaanib-e-duniya

hamein aana tha hum aae mashiyyat ki ada hokar

KHuda rakhe salamat tum ko rahna hai abhi 'turfa'

kisi ka rahbar ban kar kisi ka rahnuma hokar