chhalak jae jo meri be-KHudi-e-dil ka paimana

chhalak jaa.e jo merī be-ḳhudī-e-dil kā paimāna

abhī ho jaa.e mai-ḳhāne se bāhar rāz-e-mai-kHāna

fazā meñ haiñ anal-mahbūb anal-mahbūb ke na.are

na jaane kis kī sūrat dekh baiThā terā dīvāna

ḳhudā kī shaan vo bhī ik taraf but ban ke baiThā hai

hameñ jis ke liye Dhānī paḌī buniyād-e-but-kHāna

hazāroñ surḳhiyāñ āñkhoñ se Tapkātā hai ġham aakar

murattab jab kahīñ hotā hai ik rañgīn afsāna

bhaḌaktī hai kahīñ aap anjuman meñ sham.a ai nādāñ

use apne paroñ se ḳhud havā detā hai parvāna

uThā deñge mire naale harīm-e-husn ke parde

ye īqān-e-yadullāhī ba-īmān-e-kalīmāna

har ik aañsū meñ us ke jo har soz-e-mohabbat hai

ye kis ne sham.a kī āñkhoñ meñ bhar dī ḳhaak parvāna

ġhazal-goī hai naam azkār-e-husn-e-dost kā 'turfa'

takallum meñ latāfat ho taḳhātub ho adībāna

chhalak jae jo meri be-KHudi-e-dil ka paimana

abhi ho jae mai-KHane se bahar raaz-e-mai-kHana

faza mein hain anal-mahbub anal-mahbub ke nare

na jaane kis ki surat dekh baiTha tera diwana

KHuda ki shan wo bhi ek taraf but ban ke baiTha hai

hamein jis ke liye Dhani paDi buniyaad-e-but-kHana

hazaron surKHiyan aankhon se Tapkata hai gham aakar

murattab jab kahin hota hai ek rangin afsana

bhaDakti hai kahin aap anjuman mein shama ai nadan

use apne paron se KHud hawa deta hai parwana

uTha denge mere nale harim-e-husn ke parde

ye iqan-e-yadullahi ba-iman-e-kalimana

har ek aansu mein us ke jo har soz-e-mohabbat hai

ye kis ne shama ki aankhon mein bhar di KHak parwana

ghazal-goi hai nam azkar-e-husn-e-dost ka 'turfa'

takallum mein latafat ho taKHatub ho adibana