چھلک جائے جو میری بے خودیٔ دل کا پیمانہ

چھلک جائے جو میری بے خودیٔ دل کا پیمانہ

ابھی ہو جائے مے خانے سے باہر راز مے خانہ

فضا میں ہیں انالمحبوب انالمحبوب کے نعرے

نہ جانے کس کی صورت دیکھ بیٹھا تیرا دیوانہ

خدا کی شان وہ بھی اک طرف بت بن کے بیٹھا ہے

ہمیں جس کے لئے ڈھانی پڑی بنیاد بت خانہ

ہزاروں سرخیاں آنکھوں سے ٹپکاتا ہے غم آکر

مرتب جب کہیں ہوتا ہے اک رنگین افسانہ

بھڑکتی ہے کہیں آپ انجمن میں شمع اے ناداں

اسے اپنے پروں سے خود ہوا دیتا ہے پروانہ

اٹھا دیں گے مرے نالے حریم حسن کے پردے

یہ ایقان یداللہی بہ ایمان کلیمانہ

ہر اک آنسو میں اس کے جو ہر سوز محبت ہے

یہ کس نے شمع کی آنکھوں میں بھر دی خاک پروانہ

غزل گوئی ہے نام اذکار حسن دوست کا طرفہؔ

تکلم میں لطافت ہو تخاطب ہو ادیبانہ