tu be-parda ho mahfil mein agar ai fitna-samane

tū be-parda ho mahfil meñ agar ai fitna-sāmāne

qiyāmat tak na aa.eñ hosh meñ phir tere dīvāne

tirī nazroñ ko kyā samjhe vo kyā jaane vo kyā maane

ki raushan jis ke jalve se hue hoñ ġham ke kāshāne

na.ī lazzat na.ī mastī Tapaktī hai nigāhoñ se

tirī āñkheñ haiñ yā saaqī mai-e-kausar ke paimāne

ye tafsīl-e-mohabbat hai ye ulfat kā ḳhulāsa hai

sulagtī hai udhar sham.eñ idhar jalte haiñ parvāne

mujhe bhī kar 'atā ik jaam sadqa un nigāhoñ kā

chhalak jaate haiñ jin nazroñ se mai-ḳhāne ke mai-ḳhāne

tire jalve kī rañgīnī koī pūchhe mire dil se

tū kis kā 'aks hai ai jaañ bhalā ye ġhair kyā jaane

hai dars apnā yahī 'manzūr' ye ta.alīm hai apnī

ḳhudā go.e ḳhudā biine ḳhudā daane ḳhudā shāne

tu be-parda ho mahfil mein agar ai fitna-samane

qiyamat tak na aaen hosh mein phir tere diwane

teri nazron ko kya samjhe wo kya jaane wo kya mane

ki raushan jis ke jalwe se hue hon gham ke kashane

nai lazzat nai masti Tapakti hai nigahon se

teri aankhen hain ya saqi mai-e-kausar ke paimane

ye tafsil-e-mohabbat hai ye ulfat ka KHulasa hai

sulagti hai udhar shamen idhar jalte hain parwane

mujhe bhi kar 'ata ek jam sadqa un nigahon ka

chhalak jate hain jin nazron se mai-KHane ke mai-KHane

tere jalwe ki rangini koi puchhe mere dil se

tu kis ka 'aks hai ai jaan bhala ye ghair kya jaane

hai dars apna yahi 'manzur' ye talim hai apni

KHuda goe KHuda bine KHuda dane KHuda shane